O‘zbekiston va Eron terma jamoalari o‘rtasidagi o‘yindan so‘ng mehmonlar murabbiyi Dragan Skochich o‘z fikrlari bilan o‘rtoqlashdi.

"Birinchidan, pandemiya davrida shu o‘yinni tashkil qilgan ikki federasiyaga rahmat aytaman. Albatta yigitlarni g‘alaba bilan tabriklayman. Eron chempionati to‘xtagani uchun futbolchilarimda charchoq alomatlari sezildi. O‘yinga tayyorlanish uchun bizda vaqt kam edi. Birinchi bo‘limda ikki taktik sxemada harakat qildik, bu bizga biroz qiyinchilik tug‘dirdi. Bizda vaziyatlarni golga aylantirishda muammolar bo‘ldi. Ikkinchi bo‘limda o‘yinni o‘zgartirishga harakat qildik. O‘zbekiston yaxshi jamoa. 6ta o‘zgarish ikki jamoaga ham foyda bo‘ldi. Sababi raqib ham biz ham yangi futbolchilarni sinovdan o‘tkazib oldik.

O‘ylashimcha, biz himoyaviy jamoa emasmiz. Biz hujumda ham yaxshi harakat qildik.  Bugungi o‘yinda o‘z g‘oyalarimni sinab ko‘rdim. Rasmiy o‘yinlarda boshqacha taktik sxemada ham o‘ynashimiz mumkin.

Italiya nashrlarida Shomurodovning "Jenoa"ga o‘tganini o‘qigandim. Bugun uning yaxshi o‘yin ko‘rsatishini sezgandim. Unga omad tilayman", — dedi Skochich.