Superliganing 17-turidan o‘rin olgan «Paxtakor» — «So‘g‘diyona» (2:0) uchrashuvidan keyingi matbuot anjumanida mehmonlar ustozi Ulug‘bek Baqoyev o‘z fikrlarini bildirdi.

"Bugun yaxshi jamoaga, O‘zbekiston chempioniga qarshi o‘ynadik. Raqib safida milliy terma jamoa a’zolari bor edi. Shu bois himoyaviy taktikani tanladik va tezkor qarshi hujumga o‘tishga intildik. Nimadir o‘xshadi, nimadir o‘xshamadi. Yigitlar bor kuchlari bilan o‘ynashdi, barchaga o‘yin uchun rahmat aytaman. «Paxtakor»ni g‘alaba bilan tabriklayman", — deydi Baqoyev.

— Bu yilgi barqarorsizlikka nima sabab bo‘lmoqda?
— Birinchi faktor mavsumni omadsiz tarzda boshladik, mag‘lubiyatlar, duranglar, ko‘p ochkolar yo‘qotdik. Keyin pandemiya, karantinlar, ritm buzildi. O‘sha paytda kim ko‘proq tayyor bo‘lsa ko‘p ochko to‘plab oldi. O‘z maydonimizda ko‘p ochkoni yo‘qotdik. Mavsum avvalida yetakchi o‘rinlarda bo‘lishni istagandik. Ammo o‘xshamadi. Bu futbol.

— Sizningcha, Cheranning golida o‘yindan tashqari holat bormidi?
— Murabbiylar zaxira o‘rindig‘idan turib bu vaziyatni ko‘rish qiyin. TV takroriy lavhalarni ko‘rib baho berish mumkin. Rostini aytaman, bu vaziyatda aniq javob bera olmayman.

— Bu mavsumdagi seleksiyadan ko‘nglingiz to‘ldimi?
— To‘g‘risini aytsam, seleksiya 50/50 bo‘ldi. Kimgadir ishondik, ba’zilar jamoaga qo‘shilib keta olmadi. Qaysidir yigitlar o‘zlaridan yaxshi taassurot qoldirmoqda, ba’zilar esa aksincha. Lekin hech kimga e’tirozim yo‘q.