Angliyaning «Manchester Yunayted» klubi bosh murabbiyi Ole-Gunnar Sulsher YECHL doirasida «Leypsig» klubiga qarshi bo‘ladigan o‘yindan oldingi fikrlari bilan o‘rtoqlashdi.

«Bizning maqsadimiz – tezroq 10 ochkoni qo‘lga kiritish, lekin ertaga bor e’tiborimizni uch ochko olishga qaratamiz.

Bu - alohida holatlar bo‘yicha g‘ayrioddiy mavsum bo‘lmoqda. Biz har 3 kunda, gohida har ikki kunda o‘yin o‘tkazyapmiz. Hech qanday dam olish yo‘q, keyin Yevropa chempionati, undan keyin yangi mavsum. Albatta, har bir pauza foyda bo‘ladi.

«Leypsig» – har bir mavsumda ajoyib tarzda o‘sib kelayotgan ajoyib jamoa. Ular o‘tgan mavsum Bundesligada uchinchi o‘rinni egallashdi va joriy mavsumni yaxshi boshlashdi.

Ular o‘tgan yili YECHLning yarim finaligacha yetib kelishdi va sovrin uchun kurash olib borishni niyat qilishgan. Ularda tashabbusni o‘z qo‘liga olgan yosh murabbiy bor, ularni kuzatish qiziq. Ular kuchli o‘ynashadi, turli xil o‘yin uslublariga osonlikcha o‘rganishadi. Qisqa qilib aytganda, bu jamoani so‘nggi yillarda kuzatish juda qiziqarli», – dedi Sulsher.