Yevropa futbolining asosiy boshqaruv organi 12 ta turli shaharlarda bo‘lib o‘tadigan Yevro-2020ga tayyorgarlik hali ham davom etayotganini ma’lum qildi.

2020 yili bo‘lib o‘tishi kerak bo‘lgan Yevropa Chempionati koronavirus pandemiyasi kuchayib ketganligi sababli, keyingi yilga qoldirilgandi.

Avvaliga 24 terma jamoasi ishtirok etadigan ushbu turnir Bilbao, Amsterdam, Baku, Buxarest, Budapesht, Kopengagen, Dublin, Glazgo, London, Myunxen, Rim va Sankt-Peterburg shaharlarida o‘tkazilishi rejalashtirilgandi.

Biroq, shu hafta ushbu format o‘zgarishi mumkinligi haqida xabar paydo bo‘ldi: UYEFA Yevropa chempionatini Rossiyada o‘tkazish taklifini ko‘rib chiqayotganligi haqida xabar tarqatildi.

Ammo, UEFA oldindan belgilangan formatdan chetga chiqish niyati yo‘q ekanligini, hammasi reja asosida bo‘lib o‘tishini ta’kidladi.

«Ayni paytda UEFAning barcha sa’yi-harakatlari Yevropa chempionati-2020ni muxlislar qarshisida, 12 ta shaharda o‘tkazishga qaratilgan», — deyiladi UEFA bayonotida.