Европа футболининг асосий бошқарув органи 12 та турли шаҳарларда бўлиб ўтадиган Евро-2020га тайёргарлик ҳали ҳам давом этаётганини маълум қилди.

2020 йили бўлиб ўтиши керак бўлган Европа Чемпионати коронавирус пандемияси кучайиб кетганлиги сабабли, кейинги йилга қолдирилганди.

Аввалига 24 терма жамоаси иштирок этадиган ушбу турнир Бильбао, Амстердам, Баку, Бухарест, Будапешт, Копенгаген, Дублин, Глазго, Лондон, Мюнхен, Рим ва Санкт-Петербург шаҳарларида ўтказилиши режалаштирилганди.

Бироқ, шу ҳафта ушбу формат ўзгариши мумкинлиги ҳақида хабар пайдо бўлди: УЕФА Европа чемпионатини Россияда ўтказиш таклифини кўриб чиқаётганлиги ҳақида хабар тарқатилди.

Аммо, УЕФА олдиндан белгиланган форматдан четга чиқиш нияти йўқ эканлигини, ҳаммаси режа асосида бўлиб ўтишини таъкидлади.

«Айни пайтда УЕФАнинг барча саъйи-ҳаракатлари Европа чемпионати-2020ни мухлислар қаршисида, 12 та шаҳарда ўтказишга қаратилган», — дейилади УЕФА баёнотида.