O‘zbekiston milliy jamoasi bugun Dubay shahrida Suriyaga qarshi o‘rtoqlik o‘yinida maydonga tushib, imkoniyatni boy berdi.

Bahsning 11-daqiqasida himoyachimiz Hojiakbar Alijonov darvozabonimiz bilan yakkama-yakka vaziyatga chiqayotgan raqib hujumchisini qo‘li bilan tortib qolgani uchun maydondan chetlatildi.

Ikkinchi bo‘lim boshida esa vakillarimiz maydon markazida to‘pni yo‘qotishdi va Mahmud al-Mavas randevuga chiqib borib, Abduvohid Ne’matovni dog‘da qoldirdi.

Oradan 3 daqiqa o‘tib hakam jamoalar o‘yinchilari sonini tenglashtirib qo‘ydi — Yusuf al-Hamviyga qizil kartochka ko‘rsatildi.

Bahsning 58-daqiqasida esa Igor Golban raqibni yiqitgani uchun hakam darvozamizga penalti belgiladi. Mahmud al-Mavasning zarbasini esa Ne’matov ajoyib seyv bilan qaytarishga muvaffaq bo‘ldi.

Bugun Abramov jamoasining o‘yini qovushmadi. Suriyaliklar yaxshi himoyachlanishdi. Faqatgina o‘yin so‘nggiga kelib O‘zbekiston raqib darvozasi tomon bosim uyushtira oldi. Jamoamiz mag‘lubiyatdan qutulib qolishi ham mumkin edi, ammo to‘p 2 marta raqib darvozasi to‘siniga tegdi. Bir marta Hojimat Erkinov, ikkinchi vaziyatda Islom Qobilovning zarbasidan so‘ng.

Shu tariqa, terma jamoamiz Suriyaga imkoniyatni boy berdi.

O‘rtoqlik o‘yini
O‘ZBEKISTON - SURIYA - 0:1 (0:0)
Gol: Mahmud al-Mavas (47)
Noaniq penalti: Mahmud al-Mavas (59, darvozabon)
Ogohlantirishlar: Lutfulla To‘rayev (11), Oybek Bozorov (52), Islom Qobilov (65), Murod Xolmuhammedov (80)
Chetlatishlar: Hojiakbar Alijonov (11) — Yusuf al-Hamviy (50)
O‘zbekiston: 12.Abduvohid Ne’matov, 2.Islomjon Qobilov, 3.Hojiakbar Alijonov, 6.Azizjon G‘aniyev,  8.Oybek Bozorov (Doston Hamdamov 60), 10.Jaloliddin Masharipov (Hojimat Erkinov 60), 18.Lutfulla To‘rayev (Sanjar Qodirqulov 83), 19.Bobir Abdixoliqov (Temurxo‘ja Abduxoliqov 76), 21.Igor Golban (Murod Xolmuhammedov 69), 22.Jamshid Iskanderov (Abror Ismoilov 69), 23.Ibrohimxalil Yo‘ldoshev.
Suriya: 01.Ibrohim Al-Meh, 03.Moyad Ajan (Xolid Kurdog‘li 67), 02.YUsuf al-Hamviy, 05.Umar Midaniy, 04.Faris Arnaut, 16.Daabul Mohir, 06.Kemal Hmeysha, 10.Mahmud al-Mavas, 12.Muhammad Usmon, 07.Ayas Usmon, 21.Alo ad-Daliy