Xabaringiz bor, bugun O‘zbekiston Kubogining 2020 yilgi mavsumi uchun qur’a tashlandi. Qur’aga ko‘ra, «Bunyodkor» Kubokning ilk uchrashuvini safarda «Qizilqum» qarshi o‘tkazadi. Bir o‘yindan iborat Kubok bahslarining qur’asi haqida "qaldirg‘ochlar" bosh murabbiyi Vadim Abramovning fikrlari bilan qiziqdik.

"O‘zbekiston Kubogi bahslari bir o‘yindan iborat. Bu yaxshimi yoki yomon? Hozir buning ahamiyati yo‘q. Pandemiya sababli ancha vaqt yo‘qotdik. Natijada O‘zbekiston Kubogini o‘tkazish yilning oxiriga qoldi. Tabiiyki, qisqa vaqt ichida musobaqani o‘tkazish kerak. Asosiysi shu va bu normal holat. Lekin biz uchun Kubok o‘yinlari ikki o‘yinga to‘g‘ri kelyapti (kulib). Bilasiz, 3 dekabr kuni Superliganing so‘nggi turini safarda «Qizilqum»ga qarshi o‘tkazamiz, oradan uch kun o‘tib endi Kubok bahslarida «Qizilqum» mehmoni bo‘lamiz. Bu xuddi Kubokda ikkita o‘yin o‘tkazishdek gap. Albatta Kubok uchrashuvini o‘z maydonimizda o‘tkazaganimiz ma’qul edi. Zero, bir jamoaga qarshi safarda ikki marta o‘ynash, ikki bor mehmonga borishning noqulay tomonlari ham bor. Shuning uchun safardagi uchrashuv bilan uyda o‘ynashning farqi bo‘ladi. PFL O‘zbekiston Kubogi qur’asining formati bo‘yicha o‘z taklifini o‘rtaga tashlaganida ayni bugun qo‘llanilgan formatni tanlagandim. Ya’ni, har bosqich uchun qur’a tashlash", — dedi Abramov.