Angliyaning "Manchester Siti" hujumchisi Gabriel Jesus jamoasining Yevropa Chempionlari Ligasidagi ambisiyalari haqida gapirdi.

«Biz tushunishimiz kerakki, Chempionlar Ligasida g‘alaba qozonish uchun shunchaki yaxshi o‘ynash yetarli emas, bizga X-faktor kerak. Bizning jamoamiz asta-sekin kerakli yetuklikka erishmoqda.

Har safar tunneldan maydonga chiqib kelganimda va Yevropa Chempionlar Ligasi madhiyasi yangraganida, o‘zgacha tuyg‘ularni his qilaman. Ushbu daqiqalarda men futbolchi bo‘lishni orzu qilgan bolaligimni eslayman. Sevimli jamoamning o‘yinlarini ko‘rish uchun tez-tez maktabni tashlab ketishimga to‘g‘ri kelgan paytlar yodimga tushadi. Onam bu so‘zlarimni o‘qishini istamayman.

Chempionlar Ligasidagi o‘nta gol kiritgan dastlabki braziliyalik yosh futbolchi bo‘lganimdan nihoyatda xursandman. Har bir futbolchining o‘z tarixi bor. Ushbu rekordni o‘rnatganimdan xursandman. Agar vatandoshlarim mening ko‘rsatkichlarimni takrorlashsa juda yaxshi bo‘lardi», - dedi Gabriyel Jezus.