O‘zbekiston Kubogini o‘zida saqlab qolish yo‘lida kurashni jamoamiz "So‘g‘diyona" bilan to‘qnashuvdan boshlaydi.
Jamoalar safida o‘yinni diskvalifikasiya tufayli o‘tkazib yuboradigan futbolchilar yo‘q. Hozirga qadar jamoalar Kubok bahslarida 6 bor to‘qnash kelishgan. Ularning 4tasida "Sherlar" zafar quchgan bo‘lsa, ikki bellashuvda durang natija qayd etilgan. Raqib darvozasiga 19 gol urib, darvozamizdan 7 to‘p o‘tkazib yuborganmiz. Toshkentda uch g‘alabaga erishganmiz. Jizzaxliklar darvozasiga 14 gol urilib, 4 to‘p qo‘yib yuborilgan. Kubokdagi o‘yinlar 1998, 2003 va 2004 yillarda bo‘lib o‘tgan.
Kubokdagi o‘zaro o‘yinlarda Mirjalol Qosimov 3 gol urishga erishgan. Jamoamizdan Ja’far Irismetov, Anvar Soliyev, Dilmurod Nazarov va raqibdan Qobil Aliqulov ikkitadan gol muallifiga aylangan. 2004 yilgi bahsda ayni paytda jamoamizda o‘ynayotgan Sadriddin Abdullayev raqib darvozasini ishg‘ol qilgan.
"Paxtakor" va "So‘g‘diyona" jamoalari o‘rtasida O‘zbekiston Kubogi nimchorak final o‘yini 8 dekabr, seshanba kuni "Paxtakor" stadionida soat 16:00da boshlanadi.
