Xabaringiz bor, Coca Cola O‘zbekiston kubogining chorak finalidan o‘rin olgan bahsda jamoamiz o‘z maydonida Qarshining “Nasaf” klubini qabul qiladi.   

Mazkur klublarning O‘zbekiston kubogidagi natijalariga nazar soladigan bo‘lsak, “Navbahor” billur sovrinni 3 marta – 1992, 1995 va 1998 yillarda qo‘lga kiritgan hamda 1993 yili final ishtirokchisiga aylanib, hal qiluvchi bahsda “Paxtakor”ga 0:3 hisobida imkoniyatni boy bergan.

“Nasaf” esa 1 marta – 2015 yili O‘zbekiston kubogi sohibiga aylangan hamda ushbu musobaqaning 5 karra (2003, 2011, 2012, 2013, 2016) finalchisi hisoblanadi.

E’tiborlisi, qarshiliklar O‘zbekiston kubogining hal qiluvchi bahsida ikki marta “Paxtakor” (2003, 2011 yillar), ikki marta “Bunyodkor” (2012-2013 yillar) va bir marta “Lokomotiv” (2016 yil)dan mag‘lubiyatga uchrashgan.

“Navbahor” hamda “Nasaf” jamoalari O‘zbekiston kubogi bahslarida o‘zaro 6 marta uchrashishgan. Afsuski, mazkur o‘yinlarning barchasida qarshiliklar zafar quchishgan.

Jumladan, O‘zbekiston kubogining 2000/2001 yillar mavsumi 1/8 finalida “Nasaf” yirik – 3:0 hisobida, 2002/2003 yillar mavsumining yarim final bahslarida “ajdarlar” – 2:1 hamda 3:1, 2014 yilgi mavsumning chorak final o‘yinlarida esa qarshiliklar 1:0 va 3:1 hisoblarida g‘alaba qozonishgan.

2019 yilgi yilgi mavsumning chorak final bahsida ham “Nasaf” Namangandan 1:0 hisobida g‘alaba bilan qaytgandi.        

Umid qilamizki, bo‘lajak o‘yinda jamoamiz zafar quchib,  kubok bahslaridagi noxush an’anaga chek qo‘yadi hamda bu boradagi tarixni yangilaydi.     

“Navbahor” – “Nasaf” klublari o‘rtasidagi bahslar doimo murosasiz va  keskin kurashlar ostida kechgan hamda bu safargi o‘yin ham bundan mustasno bo‘lmaydi, albatta.

Eslatib o‘tamiz, O‘zbekiston kubogining chorak finalidan o‘rin olgan “Navbahor” – “Nasaf” bahsi ertaga Namangan shahridagi “Markaziy” o‘yingohda soat 16:00 da start oladi.   

“Navbahor” PFK matbuot xizmati.