Хабарингиз бор, Coca Cola Ўзбекистон кубогининг чорак финалидан ўрин олган баҳсда жамоамиз ўз майдонида Қаршининг “Насаф” клубини қабул қилади.   

Мазкур клубларнинг Ўзбекистон кубогидаги натижаларига назар соладиган бўлсак, “Навбаҳор” биллур совринни 3 марта – 1992, 1995 ва 1998 йилларда қўлга киритган ҳамда 1993 йили финал иштирокчисига айланиб, ҳал қилувчи баҳсда “Пахтакор”га 0:3 ҳисобида имкониятни бой берган.

“Насаф” эса 1 марта – 2015 йили Ўзбекистон кубоги соҳибига айланган ҳамда ушбу мусобақанинг 5 карра (2003, 2011, 2012, 2013, 2016) финалчиси ҳисобланади.

Эътиборлиси, қаршиликлар Ўзбекистон кубогининг ҳал қилувчи баҳсида икки марта “Пахтакор” (2003, 2011 йиллар), икки марта “Бунёдкор” (2012-2013 йиллар) ва бир марта “Локомотив” (2016 йил)дан мағлубиятга учрашган.

“Навбаҳор” ҳамда “Насаф” жамоалари Ўзбекистон кубоги баҳсларида ўзаро 6 марта учрашишган. Афсуски, мазкур ўйинларнинг барчасида қаршиликлар зафар қучишган.

Жумладан, Ўзбекистон кубогининг 2000/2001 йиллар мавсуми 1/8 финалида “Насаф” йирик – 3:0 ҳисобида, 2002/2003 йиллар мавсумининг ярим финал баҳсларида “аждарлар” – 2:1 ҳамда 3:1, 2014 йилги мавсумнинг чорак финал ўйинларида эса қаршиликлар 1:0 ва 3:1 ҳисобларида ғалаба қозонишган.

2019 йилги йилги мавсумнинг чорак финал баҳсида ҳам “Насаф” Намангандан 1:0 ҳисобида ғалаба билан қайтганди.        

Умид қиламизки, бўлажак ўйинда жамоамиз зафар қучиб,  кубок баҳсларидаги нохуш анъанага чек қўяди ҳамда бу борадаги тарихни янгилайди.     

“Навбаҳор” – “Насаф” клублари ўртасидаги баҳслар доимо муросасиз ва  кескин курашлар остида кечган ҳамда бу сафарги ўйин ҳам бундан мустасно бўлмайди, албатта.

Эслатиб ўтамиз, Ўзбекистон кубогининг чорак финалидан ўрин олган “Навбаҳор” – “Насаф” баҳси эртага Наманган шаҳридаги “Марказий” ўйингоҳда соат 16:00 да старт олади.   

“Навбаҳор” ПФК матбуот хизмати.