Bugun, 8 yanvar kuni Buxoro futbol assosiasiyasining navbatdagi Kongressi bo‘lib o‘tdi. Unda Buxoro futbol assosiasiyasi Ijroqo‘m a’zolari hamda ommaviy axborot vositalari vakillari ishtirok etishdi. Shuningdek, kuzatuvchi sifatida O‘zbekiston futbol assosiasiyasi va O‘zbekiston futbol assosiasiyasi hududiy futbol assosiasiyalari bilan ishlash bo‘limi mutasaddilari, qolaversa, delegatlar sifatida Buxoro viloyati tuman (shahar)lar futbol assosiasiyalari Prezidentlari, viloyat boshqarma va tashkilotlar rahbarlari, O‘zbekiston Pro-liga va 1-liga musobaqalarida ishtirok etuvchi futbol klublari, viloyat futbol mahorat maktabi, bolalar va o‘smirlar futbol maktabi, futbol faxriylari qatnashishdi.
Kongress kun tartibidan o‘rin olgan birinchi masalada Buxoro futbol assosiasiyasi tomonidan 2020 yil davomida amalga oshirilgan ishlar hisoboti eshitildi. Shu bilan birga viloyat futbol assosiasiyasining 2021 yilgi byudjeti tasdiqlandi hamda viloyat futbol assosiasiyasi birinchi vise prezidenti, qolaversa, Buxoro futbol assosiasiyasi Ijroiya qo‘mitasi a’zolari saylandi. Unga ko‘ra, viloyat hokimi vazifasini bajaruvchi Botir Zaripov Buxoro viloyat futbol assosiasiyasi Prezidenti, viloyat Ichki Ishlar boshqarmasi boshlig‘i Shuhrat Aliyev Buxoro viloyat futbol assosiasiyasi vise prezidenti, Farrux Hamroyev Buxoro viloyat futbol assosiasiyasi I vise prezidenti etib tasdiqlandi.
Tadbirda so‘z olgan viloyat rahbari so‘nggi yillarda xalqimizning salomatligi to‘g‘risida g‘amxo‘rlik qilish, ma’naviy va jismoniy barkamol avlodni shakllantirish, millionlar o‘yini bo‘lgan va mamlakatimizda alohida o‘rin tutadigan sportning futbol turiga aholini, ayniqsa, yoshlarni keng jalb etish bo‘yicha bir qator chora-tadbirlar amalga oshirilib kelinayotganligi alohida ta’kidladi. Qayd etilganidek, bugungi kunda yurtimizda futbol jadal rivojlanib bormoqda. Oliy ligadan Superligaga o‘zgartirilgan milliy chempionatimiz ham rivojlanib borayapti.
Garchand viloyatimiz bosh jamoasi “Buxoro” klubi 2020 yilgi Superliga bahslarida omadi kelmagan bo‘lsada, jamoada yangidan-yangi iste’dodli o‘yinchilar kashf etilmoqda. Bu bejiz emas. Chunki mamlakatimiz futbolining har bir davrida Buxoroning o‘ziga xos iqtidorli futbolchilari mavjud bo‘lgan. Ular turli yoshdagi terma jamoalardan tortib, milliy terma jamoamiz safida o‘nlab uchrashuvlarda o‘z mahoratlarini namoyish etishgan. Bunday iqtidor egalari hozir ham bor.
— Mana, yaqinda klubda o‘zgartirishlar qildik. Murabbiylar shtabini yangiladik. Ko‘ramiz, ular qanday natija ko‘rsatisharkan? Biz barcha sohalarda bo‘lgani kabi futbolda ham ishlaydigan tizim barpo etishimiz kerak, -dedi Botir Zaripov.
Kongressda so‘z olgan O‘zbekiston futbol assosiasiyasi vise prezidenti Shoakram Isroilov Buxoro futbolining o‘ziga xos tarixi borligini, uning ana shu tarixiy an’analarini qayta tiklash zarurligini aytib o‘tdi.
Shu kuni yig‘ilishda viloyatimmiz shahar va tumanlaridagi mahallalarda sport maydonchalarini tashkil etish, yopiq sport majmualaridan samarali foydalanish masalalari ham ko‘rib chiqildi.
Bu borada viloyat hokimining o‘rinbosari Botir Shahriyorovning axboroti eshitildi. Botir Zaripov axborotda qayd etilgan kamchiliklarning qisqa muddatda bartaraf etish yuzasidan shahar va tumanlar hokimlari, tegishli mutasaddilarga topshiriq berdi.
Viloyat hokimligi matbuot xizmati