Bugun tunda A seriya 17-turining yana bir muhim o‘yini bo‘lib o‘tadi. "Yuventus" - "Sassuolo".

O‘tgan turda har ikki klub ishtirokidagi o‘yin kanallarimiz orqali translyasiya qilingan. Pirlo jamoasi "Milan"ning mag‘lubiyatsiz seriyasiga chek qo‘ygan bo‘lsa, "Sassuolo" Eldordan gol o‘tkazib bo‘lsada "Jenoa"ni yenggan.

Albatta, turinliklarning g‘alabasi qirolning qaytishi sifatida baholandi. Ya’ni, "Yuventus" yana chempion bo‘lish uchun asosiy davogar-u, qolganlar, jumladan "Milan" ham vaqtinchalik to‘siqdek. Ammo, hammasi u qadar jo‘n emas. 17-turga kelib "Yuve" hozircha qatorasiga uch o‘yinda g‘alaba qozona olmagan. Bir, ikki... va sanoq yana boshidan boshlanadi.

Pirlo tomonidan sekin-asta joriy etilayotgan qisqa uzatmali o‘yin hali mukammal ko‘rinishga kelmadi, pressingni yaxshi uddalagan klub bu o‘yinni buzib qo‘ymoqda. Lekin, bugungi raqib kuchli pressing bilan maqtana olmaydi. Agar "Yuventus" yengsa, qatorasiga 3 g‘alabaga yetgan, ayni dam o‘zidan bir ochko ortda qolayotgan raqibdan ancha ildamlagan bo‘lardi. Favorit, shubhasiz, Ronaldu va jamoadoshlari.

"Sassuolo" haqida kechroq, o‘yinga yaqin yozaman, nasib qilsa. Qiziq jamoa. Bugun gollar ko‘p bo‘lishini kutyapman. Birga ko‘ramiz!

"Yuventus"-"Sassuolo"
00:45/Futbol TV

Orif Tolipov.