Fransiya terma jamoasining sobiq hujumchisi Tyerri Anri bu yil «Oltin to‘p»ni kimga bergan bo‘lishini aytdi.

«Bu safar tanlov o‘tgan yildagidek oson emas. O‘shanda Usmon Dembele eng yaxshi bo‘lishi aniq edi. Bu yil esa vaziyat biroz murakkabroq.

Xarri Keyn... O‘tgan mavsum Germaniyada eng yaxshi futbolchi Maykl Olise bo‘ldi. Agar inglizlardan jahon chempionatida kim eng yaxshi bo‘lganini so‘rasangiz, ular Jud Bellingemni aytadi. Ammo Bellingem haqida gapiradigan bo‘lsak, uning «Real»dagi mavsumi unchalik omadli o‘tmadi.

Keyin Rodri bor. U jahon chempionatida ajoyib o‘ynadi va turnirning eng yaxshi futbolchisi bo‘ldi. Ammo mavsum davomida u unchalik ko‘p o‘ynamadi. Lamin Yamal ham jahon chempionatida yaxshi o‘ynay olmadi, chunki musobaqaga jarohat bilan kelgan edi.

Erling Xolandni ham chetda qoldirib bo‘lmaydi. U istalgan vaziyatdan gol urayotganini qanday inkor qilish mumkin? Ammo, menimcha, u men tilga olgan ayrim futbolchilardan ortda qoladi. Kvarasxeliya jahon chempionatida ishtirok etmadi. Agar Argentina jahon chempionligini qo‘lga kiritganida, Lionel Messi ham Jahon kubogi, ham «Oltin to‘p»ni olardi. Ammo uning uchun afsuski, bunday bo‘lmadi.

Shunday qilib, Maykl Olise qoladi. U mening favoritim Kilian Mbappega juda yaqin. Odamlar Mbappe hech narsa yutmadi, deyishi mumkin. Ammo uning individual natijalariga qarang: Chempionlar ligasida eng yaxshi to‘purar, La Ligada eng yaxshi to‘purar va jahon chempionatida ham eng yaxshi to‘purar bo‘ldi. Oliseniki ham golli uzatmalar borasida shunga o‘xshash. Bu aql bovar qilmas darajadagi natija.

Mbappening jahon chempionati va Chempionlar ligasida qancha gol urgani haqida o‘ylasangiz, bu shunchaki hayratlanarli. Nomzodlarning barchasi juda yuqori saviyadagi futbolchilar, ammo shaxsan men Kilianni tanlagan bo‘lardim. Olise ham unga juda yaqin», — dedi Anri CBS Sports efirida.