«Barselona» avvalgi transfer oynasida amalga oshirgan xaridlari bo‘yicha qarzlarining bir qismini yopdi.

Ispaniyaning Sport nashri xabariga ko‘ra, kataloniyaliklar Dani Olmo uchun 34,4 mln yevro, Rafinya uchun 19 mln yevro, Jyul Kunde uchun 12,3 mln yevro, Robert Levandovski uchun 11,1 mln yevro va Vitor Roke uchun 7,3 mln yevro to‘lagan.

Shu tariqa, «Barselona» ushbu besh transfer bo‘yicha jami 84 mln yevrodan ortiq mablag‘ o‘tkazgan.

Biroq klub barcha qarzlarini hali to‘liq yopgani yo‘q. 30 iyun holatiga ko‘ra, «Barselona»ning boshqa klublar oldidagi qarzi 167,4 mln yevroni tashkil etgan.

Moliyaviy majburiyatlarning salmoqli qismi Entoni Gordon transferi bilan bog‘liq. «Barselona» «Nyukasl» bilan 22 mln yevro miqdoridagi to‘lovni 2027 yilga ko‘chirish bo‘yicha kelishuvga erishgan. Dastlab ushbu mablag‘ iyun oyi oxirigacha to‘lanishi kerak edi.

Klubning moliyaviy yili 30 iyunda yakunlangani sabab, 1 iyuldan keyin amalga oshirilgan transferlar mazkur hisobotga kiritilmagan.