O‘zbekiston milliy jamoasi Armaniston klubiga qarshi o‘rtoqlik o‘yini o‘tkazadi

O‘zbekiston milliy jamoasi jahon chempionati saralash bosqichi o‘yinlariga tayyorgarlik doirasida fevral oyida Dubayda o‘quv-mashg‘ulot yig‘ini o‘tkazadi.

O‘zbekiston futbol assosiasiyasi terma jamoalar bo‘limi boshlig‘i Aziz Haydarovning Tribuna.uz muxbiriga ma’lum qilishicha, milliy jamoaning 30 mart kungi Yamanga qarshi o‘yinga tayyorgarlik doirasida fevral oyida Dubayda Iordaniya va Armaniston klubiga qarshi o‘rtoqlik uchrashuvi o‘tkazish borasida kelishuvga erishilgan.

«Iordaniya milliy jamoasi bitta emas, ikkita o‘yin o‘tkazishni so‘radi. Ammo o‘zimiz ularga qarshi faqat bitta o‘yinda maydonga tushishni istadik. Shuningdek, hozircha, Dubayda Armaniston klubi bilan ham o‘yin o‘tkazishimiz aniq bo‘ldi», - deydi Aziz Haydarov.

Avvalroq, Vadim Abramov boshchiligidagi milliy jamoamiz 8-18 fevral kunlari Dubay shahrida mashg‘ulot olib borishi va yig‘in doirasida uchta o‘rtoqlik o‘yini o‘tkazilishi rejalashtirilgani ma’lum qilingandi. Xususan, 15 fevral kuni milliy jamoa a’zolari BAA futbol assosiasiyasi maydonida Iordaniya milliy jamoasiga qarshi bahs olib boradi.

Ma’lumot uchun, avvalroq O‘zbekiston milliy jamoasining JCH-2022 saralash bosqichi doirasidagi Yamanga qarshi o‘yini taqvimda ko‘rsatilganidek safarda emas, 30 mart kuni Toshkentda o‘tkazilishi mumkinligi xabar qilingandi.