Bilmadim, negadir Tomas Tuxel hech qachon xarizmasi yuqori shaxs sifatida taassurot uyg‘otmagan menda.

2018 yilning mayida "PSJ" uni yangi bosh murabbiy sifatida e’lon etgach, bu super tarkib uchun ikkinchi Emeri keldi, deb hisoblaganman. Mana ikki yarim yildan so‘ng qaralsa ko‘proq yanglishgandek ko‘rinishim mumkin. Har holda u jamoa bilan birga Fransiyada yetakchilikni saqlab qolib, CHL finaligacha bordi. Bu – natija. Ammo, uning klubdan ajralish nuqtasiga yaqinroq nazar tashlansa, aynan xarizma va ta’sir vaznining yetishmasligiga guvoh bo‘lish mumkin. "PSJ" direktori Leanardo bilan ochiq nizoga borgan Tuxel birinchi qulay imkoniyatdayoq yuqoridan kuchli zarbaga uchrashi aniq edi. Klub turnir jadvalida “Lill” va “Lion”ni bor yo‘g‘i bir (!) ochkoga oldinga qo‘yib yuborgach, murabbiy CHL finalidan 4 oy o‘tib-o‘tmay iste’foga chiqarildi.

Tabiiyki, rezyumesi anchayin boy bo‘lgan Tuxel ko‘p vaqt ishsiz qolmasligi tayin edi. Biroq, men uni Londonga kelishini kutmagandim. Abramovich murabbiylarni almashtirish bo‘yicha Helayfiydan ("PSJ" prezidenti) badtarroq. Lempard klub 9-pog‘onada bo‘lib turganida iste’foga chiqarilgan bo‘lsada, turnir jadvali yuqori qismidagi zichlik Mendeleev jadvalidagi Osmiydan ham zichroq. Va yaqin 3-4 tur ichida hammasi butkul o‘zgarib, “Chelsi” to‘rtlikka qaytib olishi mumkin. Shunday bo‘lsa, bu Tuxelning xizmati bo‘lmaydi, menimcha. Rossiya va Isroil pasportiga ega milliarder uchun APL va CHLdagi muvaffaqiyat birdek muhim. Mavsum avvalida transferlarga u kabi pul sarflagan insonning bunday natija kutishga haqqi bor, albatta. Aynan amalga oshirilgan transferlar, kelgan futbolchilardan samarali foydalanadi, degan o‘y bilan tanlandi, menimcha, Tuxel.

Tomas uchun ilk raqib juda bir yoqimli emas. “Vulverhempton”. O‘zi Frenkning kursisi 15 dekarb kuni “bo‘rilar” maydonidagi uchrashuvdan so‘ng yaxshigina silkinib olgandi (2:1). Xo‘sh, germaniyalik mutaxassis Angliyada qanday debyut qilar ekan?

Birga ko‘ramiz!

23:00/Futbol TV
“Chelsi” – “Vulverhempton”

Orif Tolipov.