Xabaringiz bor, futbol bo‘yicha Olimpiya terma jamoamizning Parij-2024 yozgi Olimpiya o‘yinlariga yo‘llanma olishini ta’minlash uchun hozirdan amaliy ishlar boshlab yuborilgan. Bu borada MOQ koshida “Olimpik” jamoasi shakllantirildi.

Bugun MOQ va O‘FA rahbariyati, “Olimpik” jamoasi vakillari o‘rtasida tashkiliy masalalarga bag‘ishlangan uchrashuv bo‘lib o‘tdi. Unda MOQ raisi Rustam Shoabdurahmonov, Jismoniy tarbiya va sport vazirining hamda O‘zbekiston futbol assosiasiyasi raisining birinchi o‘rinbosari Ravshan Ermatov, MOQ raisi o‘rinbosari Saken Polatov, «Paxtakor» futbol klubi bosh direktori Dmitriy Adisman, “Olimpik” FK bosh direktori Alisher Polatov va jamoa bosh murabbiyi Timur Kapadzelar ishtirok etishdi.

Dastavval, Timur Kapadze mavsumga olib borilayotgan tayyorgarlik, jamoaga jalb qilingan futbolchilar haqida ma’lumot berdi. Shundan so‘ng MOQ raisi mavsumning ochilish o‘yiniga tayyorgarlik bo‘yicha o‘z tavsiyalarini berib o‘tdi.

“Mavsum boshida jamoamizni tanishtirish uchun matbuot anjumani tashkil qilsak. Qolaversa, ilk uy uchrashuvini yuqori saviyada tashkil qilish bo‘yicha ham bir qator dasturlarni ko‘rib chiqishimiz lozim. Fursatdan foydalanib, o‘zbek futbolining rivoji uchun yosh futbolchilarni «Olimpik» jamoasiga qo‘yib yuborishga rozi bo‘lgan bir qator klublarimizga minnatdorchilik bildirib o‘tmoqchimiz. Asosiysi, bizning tashabbusimizni hukumatimiz qo‘llab-quvvatlamoqda”, – dedi MOQ raisi.

Shuningdek, suhbat davomida jamoaning vaqtinchalik bazasi joylashadigan “JAR” sport majmuasining imkoniyatlaridan to‘liq foydalanish, uning foydalanilmayotgan hududlarida yuqori sifatli sun’iy maydonlarni qurish, futbolchilar bilan tuziladigan shartnomalarni batafsil o‘rganib chiqish bo‘yicha tegishli ko‘rsatmalar berildi. Eslatib o‘tamiz, «Olimpik» jamoasi 2021 yil futbol bo‘yicha O‘zbekiston chempionatining Pro-ligasida ishtirok etadi.