OFK talabiga ko‘ra Superliga bosh murabbiyi albatta Pro lisenziyasiga ega bo‘lishi shart.

O‘FA bizga taqdim etgan ma’lumotga ko‘ra, ayni holatda Superliganing uch (!) va Pro liganing uch klubi bosh murabbiylari Pro lisenziyasiga ega emas, aniqrog‘i, ular imtihonlardan o‘ta olmagan. Qayta topshirish imtihoni mart oyiga belgilangan. Unga qadar biz mazkur mutaxassislarni vaqtincha ro‘yxatdan o‘tkazib turamiz. Ammo ular qayta topshirish imtihonidan ham yiqilsa, klub mazkur murabbiy bilan shartnomani bekor qilishi talab etiladi. Ya’ni, OFK lisenziyalash davriga qadar Pro lisenziyasi mavjud murabbiy klub bilan shartnoma tuzib ulgurishi kerak.

Izoh. Mart oyida vaqtinchalik ro‘yxatdan o‘tkazib turish masalasi pandemiya ta’sirida kelingan qaror bo‘lib, ko‘plab mamlakatlar yopiq rejimda ekanidan kelib chiqib, bir necha oy davomida o‘quv kurslarini tashkil qilishning imkoni bo‘lmadi.

Biz joriy mavsumdan e’tiboran Pro liga klublari murabbiylaridan ham sekin-asta Pro lisenziyasi talab qilishni boshladik. Davlat ulushi bor bo‘lgan korxona tomonidan moliyalashtirilayotgan klublar qaysi ligada o‘ynashidan qat’iy nazar, OFK talabiga javob berishi shart. Ular o‘zlariga katta oylik-maosh yozib olish uchun emas, birinchi navbatda OFK va O‘FA talabini bajarishlari uchun moliyalashtiriladi. Mana shu prinsipni barcha klublar birdek tushunib olishlari shart.