Bugun poytaxtdagi NBU stadionida "Qo‘qon-1912" hamda "Surxon" jamoalari o‘rtasidagi o‘rtoqlik uchrashuvi bo‘lib o‘tdi. Mazkur o‘yinda qo‘qonliklar 2:0 hisobida g‘alaba qozonishdi.

Bugun "Qo‘qon-1912" safida yaponiyalik yarim himoyachi Tatsuro Nagamatsu harakat qildi. Ushbu futbolchi o‘tgan mavsumni Latviya superligasi vakili bo‘lgan "Daugavpils" jamoasida o‘tkazgan.

Bellashuv kutilganidek, vodiyliklarning faolligi bilan boshlandi. 15-daqiqada Asadbek Sobirjonov o‘ng qanotdan yaxshi uzatmani amalga oshirgan edi. Raqib himoyachilari vaziyatni o‘qiy olishdi. 25-daqiqada Norbekov tezkorlik bilan qarshi hujumga o‘tib ketgan edi. Uning so‘nggi zarbasi biroz kuchsiz chiqdi. Tanaffusga jamoalar nursiz durang bilan chiqib ketishdi.

Ikkinchi taym "Qo‘qon-1912" uchun omadli boshlandi. 49-daqiqada burchak zarbasidan Hojimirzayevning uzatmasini Ivan Yosovich boshi bilan raqib darvozasiga joylab qo‘ydi.

Uchrashuvning so‘nggi daqiqasida Anvar Hojimirzayev raqib darvozasiga kuchli zarba yo‘llagan edi. Darvozabon qaytardi. Qaytgan to‘pga birinchi bo‘lib yetib borgan Rahmatullayev esa bo‘sh qolgan darvozani ishg‘ol qildi. Rahmatullayev ikkinchi bo‘limda zaxiradan maydonga tushgan edi. Shu tariqa, Toshkentdagi yig‘in doirasida navbatdagi bahsda ham "Qo‘qon-1912" raqibidan ustun keldi.

O‘rtoqlik o‘yini
"Qo‘qon-1912" - "Surxon" 2:0 (0:0)
Gollar: Ivan Yosovich (49), Jamshid Rahmatullayev (90)
"Qo‘qon-1912": Xurshid Xo‘jayev, Slavko Lukich, Bobur Akbarov, Ivan Yosovich, Avazxon Mamatxo‘jayev, Muhmmadanas Hasanov, Farhod Bekmurodov, Tatsuro Nagamatsu, Asad Sobirjonov, Mo‘min Meliyev, Shohnazar Norbekov.
Zaxira: Muzaffar Abdullayev, Eldor Adhamov, Yakuba Bamba, Ilhom Vahobov, Iqbol Malikjonov, Anvar Xojimirzayev, Sardor Azimov, Sardor Yetovqo‘ziyev, Jamshid Rahmatullayev, Bekzod Xamidov.