Avval xabar berganimizdek, futbolimiz faxriysi, sport jurnalistikasi darg‘asi, o‘zbek sharhlovchiligi asoschisi Axbor Imomxo‘jayev bugun 85 yoshni qarshi oldi.

Axbor Rustamovich Imomxo‘jayev 1936 yil 19 fevral kuni Toshkentda tavallud topgan. Umrini o‘zbek sportiga baxshida qilgan ushbu inson zamonaviy o‘zbek sport jurnalistikasining asoschilaridan biridir.

Butun umri davomida ommaviy sport targ‘iboti bilan mashg‘ul bo‘lgan. Futbol sohasida ko‘plab kitoblar muallifi. Faoliyati davomida futbol uchrashuvlarida hakamlik qilib, Respublika toifasidagi hakam darajasigacha yetib borgan. 10 yil davomida O‘zbekistonning eng yaxshi hakamlari qatorida bo‘lgan. «Paxtakor» futbol klubida jamoa boshlig‘i lavozimida ishlagan. O‘zbekiston televideniyesida sport tahririyati sharhlovchisi, bo‘lim mudiri va bosh muharrir lavozimlarida faoliyat ko‘rsatgan. Uning qalamiga mansub “Futbol – quvonchim, dardim, faxrim”, “Maftuningman, futbol” va “O‘zbegimning Mirjaloli”, o‘zbek futbolining 100 yilligiga bag‘ishlab “Asr futbolidagi asl qadrdonlarim” kabi kitoblari futbol muxlislarida katta qiziqish bilan kutib olingan va hozirgacha sevib mutolaa qilinadi. Axbor ota o‘zbek sporti rivojiga qo‘shgan hissasi uchun hukumatimiz tomonidan «Shuhrat» medali, "O‘zbekiston Respublikasida xizmat ko‘rsatgan yoshlar murabbiyi" faxriy unvoni bilan taqdirlangan. Shuningdek, Turon fanlar akademiyasining akademigi va O‘zbekiston jurnalistlarining “Oltin qalam” milliy mukofoti sovrindori hisoblanadi.

Bugun ushbu insonni qutlug‘ yosh bilan qutlash futbol va sport jamoatchiligi vakillari Axbor Imomxo‘jayevning xonadoniga tashrif buyurdi va ularni tavallud ayyom bilan tabrikladi. MOQ prezidenti Rustam Shoabdurahmonov, O‘FA birinchi vise-prezidenti Ravshan Ermatov, MOQ bosh kotibi Oybek Kasimov, O‘zbekiston sport faxriylari kengashi raisi Bahodir Maxsitov, O‘FA Faxriylar kengashi raisi To‘lagan Isoqov shuningdek, MOQ va O‘FAning bir qator vakillari Axbor otani qutlab, ularga sog‘lik-salomatlik tiladi hamda esdalik sovg‘alarini topshirdi.

O‘z navbatida ustoz sharhlovchi tashrif buyurganlarga tashakkur bildirgan holda, sportimiz va futbolimiz yanada yuksalishi yo‘lida amalga oshirilayotgan ishlar rivojini tilab, duo qildi.