Qarshidagi bellashuvdan keyin "Paxtakor" bosh murabbiyi matbuot anjumanida ishtirok etdi.

- Judayam qiziqarli bahs guvohi bo‘ldik, biz oldingi o‘yinchalik yaxshi o‘ynay olmadik. "Nasaf"ning bizga qarshi zo‘r tayyorgarlik ko‘rgani sezilib turdi va raqib o‘yinni juda yaxshi boshladi. Uchrashuv avvalida bir nechta xatolarga yo‘l qo‘ydik va buning oqibatida "Nasaf"da bo‘sh hududlar vujudga keldi.

"Nasaf" hisobni 2:0 ko‘rinishga keltirganida biz yanada qiyin vaziyatga tushib qoldik. Ammo jamoamiz xarakter ko‘rsatib, yakunda 3:2 hisobida g‘alaba qozona oldik. Futbolchilarimiz jang qila olishlarini namoyon etishdi. Stadion to‘la payt o‘ynash oson emas, chunki bosim yuqori bo‘ladi. Lekin ikkinchi tomondan futbolda baribir muxlislarni ko‘rish yoqimli.

O‘ylaymanki, bizda futbolchi almashtirishlar to‘g‘ri bo‘ldi va buning oqibatida o‘yinimiz kuchaydi. Yosh futbolchi Ibrohimhalil Yo‘ldoshev g‘alaba to‘pini kiritdi, bu esa menga juda yoqdi. Chempionatni safarda g‘alaba bilan boshlash yoqimli. Endi dushanba kuni bo‘ladigan "Mash’al"ga qarshi bahsga tayyorgarlik ko‘ramiz.

"Nasaf" - yaxshi jamoa. Ular hujumkor futbol namoyish etib, bizni shoshirib qo‘yishdi. Bugungi bahsda oramizdagi farq vaziyatlardan foydalanishda bo‘ldi.

Safimizda yo‘qotishlar bo‘ldi, ammo biz bor tarkib bilan ishlashda davom etishimiz kerak. Meni xursand qilayotgan tomoni - markaziy himoyamizda Yegor Krimes va Anzur Ismoilovga o‘xshagan tajribali futbolchilarning borligi. Shuningdek, yoshlardan Erkinov, Yo‘ldoshev kabilarni ayta olaman.

Keyingi uchrashuvda nima bo‘lishini bilmayman, chunki dushanbagacha oldimizda vaqt bor va hali mashg‘ulotlar o‘tkazamiz. Yo‘ldoshev yaxshi futbolchi, u g‘alaba to‘pini kiritganida xursand bo‘ldim. Lekin bizda boshqa yaxshi futbolchilar ham bor va kim mashg‘ulotlarda o‘zini ko‘rsatsa, o‘shalar boshlang‘ich tarkibdan joy egallaydi.