O‘zbekiston Superligasining 1-tur uchrashuvlari o‘tkazildi. «Daryo» ortda qolgan turda kuzatilgan diqqatga sazovor voqealarni taqdim etadi.

Muxlislar tashrifi

O‘tkazilgan 7 ta o‘yinga umumiy hisobda 47 782 nafar muxlis tashrif buyurdi (har bir o‘yinda o‘rtacha — 6 826). Namanganda kechgan «Navbahor» — «So‘g‘diyona» (0:1) o‘yinini bevosita stadiondan 17 585 ming tomoshabin kuzatib bordi. Bu turning eng yaxshi ko‘rsatkichi bo‘ldi. Eng kam muxlis tashrif buyurgan bahs esa Olmaliqda kechdi. OKMK va «Lokomotiv» (2:1) uchrashuviga 1000 ming nafar muxlis tashrif buyurdi. Qarshida kechgan «Nasaf» va «Paxtakor» (2:3) o‘rtasidagi o‘yinni esa 11 812 kishi tribunadan kuzatib bordi.

Gollar

Superliganing 1-turida 15 ta gol urildi. Shundan 8 tasi mezbonlar hisobiga yozilgan bo‘lsa, qolgan 7 tasi mehmon jamoalar hissasiga to‘g‘ri keldi. Turning eng sermahsul o‘yini «Nasaf» — «Paxtakor» bahsi (2:3) bo‘ldi. Mazkur bahsda 5 ta gol urildi.

Turdagi eng tezkor gol esa OKMK — «Lokomotiv» (2:1) bahsida kiritildi. Elvin Fortes 3-daqiqada Toshkent klubi darvozasini ishg‘ol qilib, Olmaliq klubini hisobda oldinga olib chiqdi. Shuningdek, bu Superliga 2021 yilgi mavsumining birinchi goli bo‘ldi.

Mehmon va mezbon jamoalar g‘alabasi

O‘tkazilgan 7 o‘yinning 4 tasida mezbon (OKMK, «Bunyodkor», «Surxon», «Qizilqum»), 3 tasida esa mehmon («So‘g‘diyona», «Qo‘qon-1912», «Paxtakor») jamoalar zafar quchdi. E’tiborlisi, bu turda during natija qayd etilmadi.

Debyutantlar

2020 yilgi mavsumda Pro-Ligada 1-o‘rinni qo‘lga kiritib, Superligaga yo‘l olgan «Turon» o‘zining yuqori diviziondagi debyut o‘yinini o‘tkazdi. Yaypan klubi «Qo‘qon-1912» bilan kuch sinashdi va 2:1 hisobida imkoniyatni boy berib qo‘ydi. Jasur Hakimov «Turon»ning Superligadagi ilk golini urdi.

Vadim Abramov asosiy e’tiborini milliy terma jamoaga qaratishi uchun «Bunyodkor»dan iste’foga chiqarilgach, uning o‘rnini Shuhrat Maqsudov egalladi. Maqsudov 1-turda «qaldirg‘ochlar» bosh murabbiyi sifatidagi ilk o‘yinini o‘tkazdi.

Bir necha yillar davomida Qatar va BAA chempionatlarida legioner sifatida faoliyat yuritgan Sardor Rashidov joriy mavsum boshida «Paxtakor» safiga qo‘shildi. Rashidov 1-turda «sherlar» safida rasmiy o‘yinlardagi ilk golini urdi.

Jasur Jaloliddinov «Bunyodkor»da porlagach, Moskvaning «Lokomotiv» klubiga yo‘l olgandi. Ammo Jasur u yerda birorta ham o‘yin o‘tkazmadi va yakunda «Andijon»ga o‘tdi. Jaloliddinov Superliga birinchi turida «Andijon» safida debyut qildi.

Yuqorida qayd etilgan niderlandiyalik futbolchi Elvin Fortes (OKMK) Superligadagi debyut o‘yinida ilk golini urishga muvaffaq bo‘ldi.

Qarshida o‘tkazilgan «Nasaf» — «Paxtakor» o‘yinida O‘zbekiston chempionatida birinchi marta VAR tizimidan foydalandi.

Kartochkalar

Superliganing 1-turida hakamlar tomonidan umumiy hisobda 24 ta sariq va 1 ta qizil kartochka ko‘rsatildi. Turning eng qo‘pol o‘yini «Nasaf» — «Paxtakor» o‘yini bo‘ldi — 5 ta sariq kartochka. Turdagi yagona qizil rangdagi kartochkani esa «Mash’al» yarim himoyachisi Muhammad Yo‘ldoshev «qo‘lga kiritdi».

Tur qahramonlari: Mirjalol Qosimov va Ibrohimxalil Yo‘ldoshev

Turning eng yaxshi murabbiyi Mirjalol Qosimov bo‘ldi. Qosimov boshchiligidagi OKMK ilk turda nisbatan kuchliroq tarkibga ega bo‘lgan «Lokomotiv»ni taslim etdi. O‘yindan oldin Toshkent klubining imkoniyatlari yuqori baholangandi. Yana shuni alohida ta’kidlash kerak, Mirjalol Qosimov shogirdlari portugaliyalik mutaxassis Mikael Sekeyra boshchiligidagi jamoani mag‘lubiyatga uchratdi.

Turning eng yaxshi o‘yinchisi nomiga esa «Paxtakor» himoyachisi Ibrohimxalil Yo‘ldoshev loyiq ko‘rildi. 69-daqiqada maydonga tushgan Yo‘ldoshev o‘zining sa’y-harakatlari bilan «sherlar»ning g‘alabasiga katta hissa qo‘shdi. Aynan Ibrohimxalilning 87-daqiqada kiritgan goli «Paxtakor»ga g‘alaba keltirdi.

Bilol Erkin tayyorladi.