14 mart kuni O‘zbekiston milliy terma jamoasi bosh murabbiyi Vadim Abramov “Kun” nashriga intervyu berib, Superliga uchrashuvlari 20 maydan e’tiboran to‘xtatilishi haqida aytib o‘tdi.

O‘zbekiston Professional futbol ligasi bunga qadar yarim yillik taqvimni taqdim etgan bo‘lib, unda 20-31 may oralig‘ida Superliganing 10-11 tur uchrashuvlari o‘tkazilishi rejalashtirilgan. Taqvim Vadim Abramovning yarim yillik rejalari asosida tuzib chiqilgan. Biroq O‘zPFL chempionatning 20 may kuni to‘xtatilishi borasida rasman ma’lumot olmagan.

Vadim Abramov shuni rejalashtirayotgan bo‘lsa, mazkur masala Murabbiylar kengashi yig‘ilishida muhokama etilishi maqsadga muvofiq bo‘ladi. Chunki chempionatning deyarli bir oyga to‘xtab turishi, kamida 13 ta klub rejalariga jiddiy ta’sir ko‘rsatishi mumkin. Shunday ekan, qolgan klublar murabbiylari fikri bilan ham qiziqib ko‘rish zarar qilmaydi.