Namanganda 26 mart kuni bo‘lib o‘tgan O‘zbekiston - Gana (2:1) terma jamoalari o‘rtasidagi uchrashuvdan keyingi matbuot anjumanining birinchi qismida Gana terma jamoasi ustozi Ibrohim Tanko va mazkur bahsdaa gol urgan hujumchi Issahaku Abdul Fatavu ishtirok etib, jurnalistlarning savollariga javob berishdi. Ular avvalo o‘yin haqidagi fikrlarini bildirishdi.

— Bugun ikkala jamoa ham yaxshi o‘ynadi. Biz ikkita jiddiy xatoga yo‘l qo‘ydik va raqib gollar urdi. Yigitlar hisobni tenglashtirishga o‘zlarida kuch topa olishdi. O‘zbekiston terma jamoasini g‘alaba bilan tabriklayman, — dedi Ibrohim Tanko.

— Juda ham ajoyib uchrashuv bo‘ldi. O‘zbekiston terma jamoasi bizning xatolarimiz evaziga g‘alaba qozondi. Bu yerda o‘ynaganimizdan xursandmiz. O‘ylashimcha, bu ikkala jamoa uchun foydali bo‘ldi, — dedi Issahaku Abdul Fatavu.

— O‘zbekiston terma jamoasi  safida qaysi futbolchilarni alohida ajratib ko‘rsata olasiz?
— Men raqib safidagi qaysidir futbolchini ajratib ko‘rsatishni yoqtirmayman. To‘g‘ri, O‘zbekiston termasi tarkibida 3-4 nafar futbolchi ajralib turdi. Buni kecha ham aytgandim. Bugun mezbonlar jamoaviy o‘yin hisobiga g‘alaba qozonishdi, deb o‘ylayman.

— Uchrashuv to‘lig‘icha O‘zbekiston termasi tashabbusi ostida o‘tdi. Bunga tayyormidingiz?
— Bu tabiiy holat. O‘zbekiston terma jamoasi o‘z maydonida, ko‘plab muxlislar qarshisida o‘ynadi. To‘p nazorati ham ular tomonida bo‘ldi. Lekin men shogirdlarim bilan faxrlanaman. To‘p o‘tkazib yuborib, hisobni tenglashtira olganimizdan xursandman.

— O‘zbekiston, Namangan shahri sizda qanday taassurot qoldirdi?
— O‘zbek xalqi mehmondo‘st sifatida yaxshi taassurot qoldirdi. O‘zim ham musulmonman, mehmondo‘stlik musulmon xalqlariga xos bo‘lgan xususiyat. Raqib maydonida o‘ynaganda, odatda muxlislar mehmon jamoa futbolchilariga qarshi muxlislik qilishadi. Bugun esa ishqibozlar ikkala jamoani ham  birdek qo‘llab — quvvatlashdi. Shu bois, uchrashuvdan keyin muxlislarga minnatdorchilik bildirdik.

“Navbahor” PFK matbuot xizmati.