O‘zbekiston terma jamoasi va «Paxtakor» futbol klubi sobiq bosh murabbiyi Ubiraja Veyga da Silva 66 yoshida vafot etdi.

Braziliyalik mutaxassis koronavirus oqibatida 23 mart, seshanba kuni olamdan ko‘z yumgan. Mutaxassis 10 kun davomida shifoxonada yotgan, so‘nggi kunlarda uning sog‘lig‘i yomonlashgan va yakunda muolajalarni ko‘tara olmay, vafot etgan. Bu haqda Jornal Correio xabar qilmoqda.

Ubiraja 1997 yilda «Paxtakor» klubida yordamchi murabbiy sifatida ish boshlagan. Shuningdek, u o‘sha yili O‘zbekiston milliy termasiga bosh murabbiy etib tayinlangan. 1998 yilda u «Paxtakor» bosh murabbiyi sifatida ishni davom ettirgan. U «sherlar» boshqaruvida 1999 yilga qadar, terma jamoada esa 1998 yilga qadar faoliyat yuritgan.

Mutaxassis qo‘l ostida O‘zbekiston terma jamoasi 8 ta o‘yin o‘tkazib, 4 g‘alaba, 2 durang va ikkita mag‘lubiyat qayd etgan. Da Silva boshqaruvidagi «Paxtakor» esa 1998 yilda 6 yil deganda birinchi marta O‘zbekiston chempionligini qo‘lga kiritgandi.