Ўзбекистон терма жамоаси ва «Пахтакор» футбол клуби собиқ бош мураббийи Убиража Вейга да Сильва 66 ёшида вафот этди.

Бразилиялик мутахассис коронавирус оқибатида 23 март, сешанба куни оламдан кўз юмган. Мутахассис 10 кун давомида шифохонада ётган, сўнгги кунларда унинг соғлиғи ёмонлашган ва якунда муолажаларни кўтара олмай, вафот этган. Бу ҳақда Jornal Correio хабар қилмоқда.

Убиража 1997 йилда «Пахтакор» клубида ёрдамчи мураббий сифатида иш бошлаган. Шунингдек, у ўша йили Ўзбекистон миллий термасига бош мураббий этиб тайинланган. 1998 йилда у «Пахтакор» бош мураббийи сифатида ишни давом эттирган. У «шерлар» бошқарувида 1999 йилга қадар, терма жамоада эса 1998 йилга қадар фаолият юритган.

Мутахассис қўл остида Ўзбекистон терма жамоаси 8 та ўйин ўтказиб, 4 ғалаба, 2 дуранг ва иккита мағлубият қайд этган. Да Сильва бошқарувидаги «Пахтакор» эса 1998 йилда 6 йил деганда биринчи марта Ўзбекистон чемпионлигини қўлга киритганди.