"Navbahor" - "Paxtakor" uchrashuvidan keyingi matbuot anjumanining ikkinchi qismida mezbonlar bosh murabbiyi Viktor Jalilov qatnashib, jurnalistlar savollariga javob qaytaradi.

"Albatta, o‘yin keskin kechdi. Biz uchun ham, raqib uchun ham. "Paxtakor"ning tarkibi ancha shakllanganini barchamiz bilamiz. Menimcha, bugungi o‘yin durangga mos edi. Ammo mag‘lubiyatga uchradik. Lekin bugun futbolchilarimiz juda yaxshi o‘yin ko‘rsatishdi. Gol urgandan keyin ham himoyaga yotib olishmadi. Qolgan voqealar haqida gapirmayman.

Farhod Mirahmatov chap qanot himoyachisi hisoblanadi. Davronbek Hoshimov esa o‘ngda o‘ynaydi. O‘ng qanot himoyachimiz Xushnud Avilov jarohat oldi. Hujumchilar muammosi esa faqat bizda emas, butun O‘zbekiston futboliga taalluqli. Bugungi kunda o‘yin taqdirini hal qiladigan sanoqli hujumchilarga egamiz. Mashg‘ulotlarda kimning qanday holatda ekanligini kuzatamiz, shunga qarab tarkib tanlaymiz.

Hozir legioner yoki mahalliy futbolchini ajratmoqchi emasman. U yoshmi, yoshi o‘tib qolganmi, men uchun maydonga tushib, "Navbahor" libosida yaxshi o‘yin ko‘rsatishi muhim. Mashg‘ulotlarda o‘zini ko‘rsatganlar o‘yinga qo‘yiladi. Isoqjonov kichik jarohat olgani sabab uni almashtirishga majbur bo‘ldim. Xullas, futbolchilarni ajratmoqchi emasman.

Mag‘lubiyatga uchradikmi, demak bizga mahorat, sovuqqonlik yetishmadi. Qaysidir pallada bizga omad yetishmadi. Yutqazdikmi, demak nimadir kamlik qildi. Kamchiliklarni muhokama qilamiz. Futbolchi almashtirish o‘yinning borishiga qarab amalga oshiriladi. Shunga ko‘ra, Tasichni maydonga tushirdik. Igor Golbanning oldinda ko‘proq foydasi tegishini inobatga olib, uni oldinga o‘tkazib, Putinchaninni orqaroqqa o‘tkazdik", — dedi Jalilov.