Xabaringiz bor, 7 aprel kuni Namangandagi “Markaziy” o‘yingohda o‘tkazilgan, Coca Cola Superliga 5-turidan o‘rin olgan “Navbahor” – “Paxtakor” (1:2) uchrashuvidan so‘ng, “Navbahor” klubining ayrim vakillari va ba’zi muxlislar o‘z hissiyotlarini jilovlay olmay, tartibsizlikka yo‘l qo‘yishdi.

9 aprel kuni “Navbahor” PFKda navbatdan tashqari yig‘ilish o‘tkazilib, unda klub rahbariyati, xodimlari, “Navbahor” jamoasi murabbiylar shtabi vakillari hamda jamoa muxlislari yetakchilari ishtirok etishdi. Yig‘ilishda “Navbahor” – “Paxtakor” o‘yini va o‘sha uchrashuvdan so‘ng yuzaga kelgan holat muhokama etildi hamda klub rahbariyati tomonidan tartibbuzarlarga nisbatan intizomiy jazo choralari qo‘llanildi.

Yig‘ilish davomida ”Navbahor” PFK tomonidan kelgusidagi futbol bahslarida madaniyat va o‘zaro hurmatga amal qilish, shu kabi jihatlarni jamoa vakillari hamda muxlislarida shakllantirish borasidagi ishlarni amalga oshirish talabi qo‘yildi.

“Navbahor” futbol klubi jamoa muxlislariga minnatdorchilik, hurmat va ehtirom bildirgan holda, Namanganda o‘tkaziladigan futbol o‘yinlarida barchani hamjihat bo‘lishga chorlab, viloyatimizga tashrif buyuradigan mehmonlarning tashriflaridan faqatgina ijobiy taassurotlar qolishini ta’minlashga o‘z hissalarini qo‘shishlarini so‘rab qoladi.

“Navbahor” PFK matbuot xizmati.