“Qizilqum” – “Nasaf” uchrashuvidan so‘ng bo‘lib o‘tgan matbuot anjumanining birinchi qismida qarshiliklar bosh murabbiyi Ro‘ziqul Berdiyev ishtirok etdi va jurnalistlar savollariga javob berdi.

— Bugun kuchli va tajribali futbolchilarga ega raqib maydonida 3 ochkoga ega bo‘ldik. Bundan judayam xursandmiz. Bizda yo‘qotilgan ochkolarni to‘ldirish vazifasi bor. Albatta, biz bugun "Qizilqum" jamoasini hujumkor o‘yin ko‘rsatishini bilardik. Birinchi bo‘limda 3 markaziy himoyachi bilan harakatlandik. Ikkinchi taym oxirlariga kelib 4-4-3 sxemasiga o‘tdik. Shu sxema orqali raqib darvozasiga ikkinchi golni kiritdik. Umuman aytganda, bugungi o‘yin teng kurashlar ostida o‘tdi. Omad ham biz tomonda bo‘ldi.

— Abduvohid Ne’matovning o‘yin qaydnomasiga kiritilmaganligiga sabab nima?
— Abduvohid Ne’matov asosiy darvozabon deb ta’kidlashingizga sabab nima? Bizda 3 nafar darvozabon bor. Ularning barchasiga imkon beramiz. Ne’matov o‘tgan mavsumda o‘zini yaxshi ko‘rsatdi. Shu sababdan u terma jamoa safiga ham jalb etildi. Bugungi o‘yinga uni jalb etmaganimizni sababi jarohat emasku, lekin sabab bor. Tayyor emasligi uchun Navoiyga uni olib kelmadik. O‘ylaymanki, keyingi o‘yingacha u tiklanadi. Navbatdagi o‘yinlarda unga ham imkoniyat beramiz.

— Oybek Bozorov qachon safga qaytadi?
— Oybek Bozorovning jarohati jiddiy bo‘lib chiqdi. Bir hafta muddat atrofida safga qaytadi deb o‘ylayman. Balki keyingi turgacha qaytar.