«Ikki yildan beri efirga chiqmayapman. Umid qilamanki, nojo‘ya gaplarni aytmayman». Sky Calcio Club ko‘rsatuvida mehmon bo‘lgan Massimiliano Allegri shunday so‘z boshladi va u juda ko‘p gapirdi.
Yangi klub haqida
- «Napoli» yoki «Roma»? Hali hech narsa bilmayman. Menga bu yerda bo‘lish, futbol haqida gapirish yoqadi. Uch yil oldin meni «Real»ga chaqirishgan, ammo keyinchalik «Yuve» bilan kelishuvga erishganman. Iyun oyida qaytib kelmoqchiman.
Italiya futboli haqida
- Juda ko‘p o‘yladim. Yeng shimarib ishlash kerak. Italiya jamoalarining xalqaro turnirlardan erta chiqib ketishi chuqur o‘ylab tahlil o‘tkazishga majbur qilishi kerak. Men haqimda asosan o‘yindan ham ko‘proq natijalarni afzal ko‘radigan murabbiy sifatida gapirishardi. Eski uslub murabbiylari ta’sirida ulg‘ayganman va biror-bir ustuvor vazifa bo‘lishi kerak emas, deb hisoblayman. Futbol jiddiy narsa va bu yerda muvozanat kerak. Futbolchilar loyihaning markazida bo‘lishlari va bu boshlang‘ich nuqtaga aylanishi lozim. Taktikalar zarur va muhim, ammo Yevropada biz o‘yinchilari to‘pni 100 km|soat tezlikda harakatlantiradigan jamoalarni ko‘ramiz. Shunday ekan, o‘zingizga savollar berishingiz, yoshlar sektorida, individual texnika ustida ishlashingiz kerak. Men bu gaplarni aytishni yomon ko‘raman, ammo futbolchilar murabbiyning mohirligini namoyish etish uchun vosita bo‘lib qolishdi. Umuman olganda, kerakli futbolchilar bo‘lmasa, taktikaga urg‘u berishdan naf yo‘q. Jamoada yaxshi uzatmani amalga oshiradigan o‘nlab futbolchi bo‘lishi kerak. Agar ular yo‘q bo‘lsa, bu haqiqiy muammo.
«Yuventus»dan ketishi haqida
- «Yuve»da beshta ajoyib mavsumni o‘tkazdim. Ajralish mutlaqo tabiiy ravishda sodir bo‘ldi. Qarashlarimizda farq kuzatildi. Sarri haqida bilmasdim. Tanlovni prezident qildi, ammo biz juda yaxshi munosabatlarga egamiz. Qaytib kelarmidim? Hozir buning iloji yo‘q. Qolaversa, Andrea, fikrimcha, jamoani yaxshi boshqarmoqda.
Pirlo haqida
- Murabbiy bo‘lish nimani anglatishini qanday tushuntirish mumkin? Ikki murabbiy bor: biri dushanbadan shanbagacha, ikkinchisi yakshanba kuni, ko‘plab kutilmagan vaziyatlar yuzaga keladigan kun ishlaydi. Agar jamoangiz 5-daqiqadayoq maydonda ozchilik bo‘lib qolsa nima qilish kerak? Bu haqda kitoblarda yozilmaydi. Shuning uchun men inson resurslarini boshqarish eng muhim narsa ekanligini ta’kidlayman. Va bu, yana takrorlayman, kitoblarda yozilmagan. «Yuventus»ga nima yetishmayapti? Fabio Kapello jamoani tashqaridan ko‘rish boshqa, uni o‘rgatish boshqacha ekanligini aytdi. Shuning uchun men bilmayman. Nazarimda, «Yuventus» yaxshi ishlayapti.
Hujumchilar haqida
- Eng zo‘rlarimi? Benzema, Levandovski, Iguain, Ibragimovich. Gonsalo ajoyib o‘yinchi. Karim aql bovar qilmaydigan darajada. Doimo uning «Real»dan ketish vaqti kelganligini aytishadi, ammo u o‘ynaydi va ishini qoyillatadi.
Ronaldu va Messi haqida
- Bu ikkisi turli xil o‘yinchi. Eng buyuk va eng qudratlisi.
Suares va Morata haqida
- Suaresning faoliyati havas qilsa arzigulik, ammo Morata uchrashuv natijasini hal qilishi mumkin. Agar bitta o‘yinda tanlash kerak bo‘lsa, demak - Alvaro.
Lukaku va Lautaro haqida
- Italiyadagi eng yaxshi hujumchilar dueti. Konte ularni birlashtirishning ajoyib yo‘lini topdi. Bu futbolchilar turli xil xususiyatlarga ega, ammo shu bilan birga ular o‘xshash va bir-birini so‘zsiz tushunishadi.
Hujumlarni orqadan qurish haqida
- Endigina «Yuventus»ga kelgandim va biz «Kyevo» bilan o‘ynadik. To‘pni egallab turish ma’lumotlarga qaragandim, Buffon to‘pni 1 daqiqayu 39 soniya ushlab turgan ekan. Keyin jamoaga unga pas bermasliklarini, aks holda, darvozabonni maydondan olib tashlashimni aytdim. Hamma narsada muvozanat bo‘lishi lozim. Hujumlarni orqadan boshlash mumkin, faqat me’yorini ham bilish kerak.
M.PO‘LATOV tayyorladi
