O‘zbekiston kubogi 1-turi doirasidagi «Buxoro» - «Dinamo» (1:1) uchrashuvidan keyin dastlab mehmonlar bosh murabbiyi Hakim Fuzaylov o‘yin borasidagi fikrlarini bildirdi.

«Buxoro» Pro ligaga chiqish uchun asosiy da’vogarlardan biri sanaladi. O‘yin qarama-qarshi hujumlar ostida kechdi. O‘ylaymanki, faqat biz uchun emas muxlislar uchun ham qiziqarli bahs bo‘ldi. O‘yindan keyin barchasini yana tahlil qilamiz. Bugun gol urishimiz kerak bo‘lgan vaziyatlarda xatolarga yo‘l qo‘ydik. Aks holda hisob boshqacha bo‘lishi mumkin edi.

Mavsum boshida yig‘ilgan tarkibdan ko‘nglim to‘ldimi? Imkonqadar tarkibni yaxshilashga intildik. Moliyaviy imkoniyatlarimizdan kelib chiqib, tarkib jamladik. Oldimizda Superligaga chiqish vazifasi turibdi va shu yigitlar bilan maqsad sari intilamiz. Umuman olganda esa Samarqanddek katta viloyat va shahar yanada kuchli tarkib va yuqori o‘rinlarga munosib. Davralar oralig‘ida ilojini topsak, tarkibni yana kuchaytirishimiz kerak», - deydi Hakim Qayumovich.