Birlashgan Arab Amirliklarining "Shabab al-Ahli" klubi bosh murabbiyi Mahdi Ali Osiyo chempionlar ligasi doirasida AGMKga qarshi bo‘ladigan o‘yin oldidan tashkil etilgan matbuot anjumanida ishtirok etib, o‘z fikrlarini bildirib o‘tdi.

"Ertangi o‘yin biz uchun muhim ahamiyatga ega, ayniqsa, "Al-Hilol"ga yutqazganimizdan so‘ng. AGMKga qarshi bahs keyingi bosqichga chiqish imkoniyatlarimizni yaxshilab olish uchun muhim hisoblanadi. Har uch kunda o‘yin o‘tkazish oson emas. Ammo biz barcha o‘yinchilarga ishonamiz.

AGMK ham bir durang va bir mag‘lubiyat qayd etdi. Ularga qarshi 2ta o‘yin o‘tkazamiz. Shuning uchun pley-offga chiqish yo‘lida bu o‘yinlar katta ahamiyatga ega. Biz shundoq ham ochkolarni yo‘qotdik. Navbatdagi 2ta uchrashuvda ijobiy natija qayd etish uchun ehtiyotkorlikni unutmagan holda vaziyatlardan unumli foydalanishimiz zarur.

"Al-Hilol"ga qarshi bahsda jismoniy charchoq tufayli yutqazdik. Maydon markazida to‘pni ko‘p yo‘qotdik. Bundan tashqari, maydonning holati ham o‘yinimizga ta’sir ko‘rsatdi.

Umid qilaman, diskvalifikasiyadan qaytgan Jaloliddin Masharipov ijobiy natijaga erishishimizda yordam beradi. U jismoniy va texnik jihatdan o‘yinga tayyor", — dedi Mahdi Ali.

Eslatib o‘tamiz, AGMK - "Shabab al-Ahli" uchrashuvi Toshkent vaqti bilan bugun tunda 00:00da boshlanadi.