A Seriya yetakchisi «Inter» Antonio Konte boshchiligida ikkinchi may kuni chempionga aylanishi mumkin. Musobaqa yakunlanishiga besh tur qolganida «neradzurrilar» eng yaqin taqibchisidan («Atalanta») 11 ochko oldinda bormoqda.

1 may, shanba kuni klub chempionat autsayderi «Krotone» ga qarshi o‘ynaydi. «Atalanta» esa o‘z navbatida ikkinchi mayda «Sassuolo» maydoniga tashrif buyuradi.

Agar «Inter» «Krotone»ni mag‘lubiyatga uchratsa va «Atalanta» «Sassuolo» bilan bahsda ochko yo‘qotsa, Antonio Konte shogirdlari A Seriya bosh titulini muddatidan oldin yutib olishadi.

So‘nggi marta «Inter» 2010 yilda Italiya chempioni bo‘lgan edi. O‘shanda Milan klubini Joze Mourinyo boshqargan.