Osiyo Chempionlpr Ligasi 6-turidan o‘rin olgan "Paxtakor" va "Eyr Fors" jamoalari o‘rtasidagi uchrashuv oldidan, toshkentliklar ustozi Piter Xyuistra o‘yin oldi fikrlari bilan o‘rtoqlashdi.
"Eyr Fors" bilan bahsdan avval matbuot anjumanida bosh murabbiy Piter Xyuistra va himoyachi Ibrohimhalil Yo‘ldoshev qatnashdi.
Xyuistra: - Bizni guruhdagi oxirgi o‘yin kutmoqda. Jamoa sha’ni uchun maydonga tushib, g‘alaba qozonishimiz kerak. Afsuski, keyingi bosqichga chiqish imkoniyatini yo‘qotib bo‘ldik. Ertaga maydonga kamroq tushayotgan futbolchilar va yoshlarga imkoniyat beramiz.
Tarkibimizda iqtidorli yoshlar borligini ko‘pchilik ko‘rdi. Ular tez orada yuqori darajaga ko‘tarilish imkoniga ega. Umid qilamanki, ushbu futbolchilar bilan keyingi yil ancha kuchliroq holda musobaqaga qaytamiz.
Yo‘ldoshev: - So‘nggi o‘yinda zafar quchishga intilamiz. Muxlislarni hech bo‘lmaganda mazkur yutuq bilan xursand qilishni istaymiz. Tarkibda men kabi yoshlar ko‘p va ko‘pchilik yaxshi saviyada o‘ynay oladi. Murabbiy ishonchini oqlashga intilamiz. Xalqaro darajadagi o‘yinlarda bosim yuqoriroq. Yosh futbolchilar bunday bellashuvlarda katta tajribaga ega bo‘ladi. Kelajakda bu bizga asqotadi.
