Biroz oldin «Andijon» bosh murabbiyi Otabek G‘ulomxo‘jayevni iste’fosi haqida xabar bergan edik. Bosh murabbiy iste’fosi yuzasidan klub vise prezidenti Doniyorbek Mullajonovning fikrlari bilan qiziqdik. Quyida vise prezidentning bosh murabbiy iste’fo borasidagi fikrlarini o‘qishingiz mumkin.

«Andijon» jamoamiz o‘z oldiga juda katta maqsadlarni qo‘ygan. Shu maqsad yo‘lida barcha tinim bilmay mehnat qilmoqda.

«Andijon» jamoasi birgina bizning emas, balkim xalqning ham jamoasi hisoblanadi. Jamoa natijasi hech kimni befarq qoldirmaydi. Muxlislarimiz jamoamizdan faqat g‘alaba talab qiladi. Biz Otabek G‘ulomxo‘jayevga vaqt va imkon berdik. Chempionat boshida jamoani shakllantirib olish uchun ham imkon berdik. Ammo jamoaning natijasi yuqorida aytib o‘tganimdek barcha uchun muhim hisoblanadi. Kubok bahslari ham biz uchun muhim edi, afsuski kubokni tark etdik.

Jamoamizdagi futbolchilar barchasi kuchli va yaxshi darajadagi futbolchilar hisoblanadi. Otabek G‘ulomxo‘jayev ham yaxshi darajadagi murabbiy. Bosh murabbiyda futbolchilarga nisbatan qattiq qo‘llik yetishmadi deb o‘ylayman. Balkim, Otabek G‘ulomxo‘jayev ko‘proq yosh futbolchilar bilan ishlaganligi sababli yigitlarga qattiq qo‘llik qilmagandir.

Gap natija bo‘lmasa bosh murabbiy almashtiraverishda emas, biz ko‘p imkon berdik. Bosh murabbiyning asosan yoshlar bilan ishlagani jamoamiz o‘yinida sezilib qoldi. Natija muhim, chunki butun Andijon xalqi sevimli jamoasidan faqatgina g‘alaba kutadi.

Shu o‘rinda Otabek G‘ulomxo‘jayevga jamoamiz uchun qilgan xizmatiga minnatdorchilik bildirib qolaman. Keyingi faoliyatida omad yor bo‘lishini chin dildan tilab qolaman", — Doniyorbek Mullajonov klub matbuot xizmatiga bergan intervyusida.