Portugaliyalik «Benazir» - Joze Mourinyoning navbatdagi iste’fosi uzoqqa cho‘zilmagan Superliga talvasasi vaqtiga to‘g‘ri keldi. Bir qarashda, Florentino Peres va Andrea Anyelli imzosi ostidagi mo‘rt g‘oyanikidan kuchliroq «gumburlash»ni yuzaga keltirish ilojsizdek tuyulgandi. Lekin «Tottenxem» rahbariyati buni uddaladi - Joze Mourinyoning kutilgan iste’fosini rasman tasdiqlash bilan OAVni birrov o‘z tomoniga burdi.
Joze Mourinyo ziddiyatli xatti-harakati va murakkab tabiatiga qaramay, APL ramziga aylandi. Boshqacha aytganda, Joze Angliya chempionatining asosiy yulduzlari qatoriga kirdi va endi shunday maqomda qoladi. Hech shubha yo‘q, Mourinyo hattoki, ishsiz yursa ham, omma e’tiboridan tushmaydi aslo.
Ma’lumot uchun, portugaliyalik mutaxassisning APLdagi faoliyati 4ta davrni o‘z ichiga oldi. Ular haqida ko‘p gapirilgan, yozilgan. Shunday ekan, keling, bu safar tafsilotlarni bir chetga suramizda Mourinyo va APL munosabatini eng muhim faktlarni o‘z ichiga olgan 4tagina tasvir yordamida esga olamiz. Shubhasiz, muxlislar bu insonni tezda sog‘insalar kerak.
Joze Mourinyo APLda: Birinchi qadam
CHELSI |2004-2007
184 o‘yin | 124 g‘alaba | 22 mag‘lubiyat
2 APL chempioni |2 Liga kubogi | Angliya kubogi | Angliya superkubogi
- Meni kalondimog‘ yoki maqtanchoq o‘rnida ko‘rmang. Lekin CHLda g‘alaba qozonganman va o‘ylaymanki, benazirman.
Joze Mourinyo APLda: ikkinchi qadam
CHELSI |2013-2015
136 o‘yin | 80 g‘alaba | 29 mag‘lubiyat
APL chempioni | Liga kubogi
- Odatda qiyinchiliklardan o‘zgacha rohatlanaman. Menimcha, kerakli joyga keldim.
Joze Mourinyo APLda: uchinchi qadam
MYU |2016-2018
144 o‘yin | 84 g‘alaba | 29 mag‘lubiyat
YEL kubogi | Liga kubogi | Angliya superkubogi
- Bir mavsumda qo‘lga kiritilgan 3ta sovrinni nazarda tutib bemalol aytaman - butun faoliyatimdagi eng og‘ir yildan qoniqdim.
Joze Mourinyo APLda: to‘rtinchi qadam
TOTTENXEM |2019-2021
86 o‘yin | 45 g‘alaba | 24 mag‘lubiyat
Joze «Tottenxem» bilan biror sovrin yutolmadi.
- Bu yerga yutqazish uchun kelganim yo‘q - mag‘lubiyatni jin ursin. «Tottenxem» sovrin yutishi uchun shu yerdaman.
Yana bir jihatga alohida to‘xtalish kerak - Joze Mourinyo «Tottenxem»da hech narsaga erishmagani haqida gapirish uncha to‘g‘ri emas. Axir u havas qiladigan darajada pul topdi. Daily Mail nashrining tasdiqlashicha, portugaliyalik mutaxassis 2023 yilgacha mo‘ljallangan shartnomasining muddatidan oldin bekor qilingani tufayli «Tottenxem»dan 15 mln. funt sterling miqdorida tovon puli oladi (ayrim manbalarda yozilishicha - 20 «limon»). Bu Mourinyoning butun faoliyati uchun odatiy holdir. Umuman olganda, klublar «Benazir»ni ko‘p bora iste’foga chiqargan va u har safar yaxshigina kompensasiya to‘loviga ega chiqqan:
2007 yil - «Chelsi» 23 mln. funt sterling to‘ladi
2013 yil - «Real» 17 mln. funt sterling to‘ladi
2015 yil - «Chelsi» 8 mln. funt sterling to‘ladi
2018 yil - «MYU» 26 mln. funt sterling to‘ladi
2021 yil - «Tottenxem» 15 mln. funt sterling to‘laydi
Umumiy hisobda aytsak, iste’folar ortidan portugaliyalik murabbiy cho‘ntagiga tushgan (tushadigan) jami summa 89 mln. funt sterlingga teng. To‘g‘ri, bu borada turli manbalarda turlicha summalar keltiriladi.
H.ATAVULLAYEV tayyorladi
