Bugun, 10 may kuni «Buxoro» klubi qarorgohida navbatdan tashqari yig‘ilishi bo‘lib o‘tdi, deya xabar bermoqda klub matbuot xizmati.

«Unda Buxoro viloyati hokimining turizm, sport, madaniyat, madaniy meros va ommaviy kommunikasiyalar masalalari bo‘yicha o‘rinbosari Botirjon Shaxriyorov, Buxoro jismoniy tarbiya va sport boshqarmasi boshlig‘i Ismoil Mirzayev, Buxoro viloyat futbol assosiasiyasi birinchi vise-prezidenti Farrux Hamroyev hamda Buxoro futbol klubi rahbariyati va ishchi xodimlari ishtirok etishdi. 

Yig‘ilish davomida «Buxoro» professional futbol klubi bosh direktori lavozimiga 2021 yil 10 maydan tajribali mutaxassis Usmon Qudratovich Toshev tayinlandi. 

Buxoro futbolida o‘chmas iz qoldirgan, shu kunga qadar Tojikiston milliy jamoasi bosh murabbiy va o‘zbekistonlik murabbiylar orasida ilk Pro-lisenziyasi sohibi Usmon Qudratovich endigi faoliyatini «Buxoro» jamoasida davom ettiradi», - deya yoziladi klub xabarida.

Ma’lumot uchun, Usmon Toshev Tojikiston milliy jamoasi bosh murabbiyi hisoblanadi. Mutaxassisning qo‘shni mamlakat milliy jamoasini tark etishi haqida hozircha xabar berilmagan.

Eslatib o‘tamiz, yanvar oyida «Buxoro» klubi bosh murabbiyi sifatida Jamshid Saidov o‘rniga Davron Fayziyev tayinlangan edi. Aprel oyi yakunida Fayziyev iste’foga chiqarilib, uning o‘rniga yordamchi murabbiy Anvar Berdiyev bosh murabbiy vazifasini bajaruvchi sifatida ish boshladi. Klub Pro liga 6-turidan keyin 10 ochko bilan 2-o‘rinda bormoqda.