"Aston Villa" klubi Angliya futbol Assosiasiyasi hamda UEFAga o‘z uy stadionidan "Manchester Siti" va «Chelsi» klublari o‘rtasida bo‘ladigan Yevropa chempionlar ligasi final o‘yinida foydalanishni taklif qildi.

Xabaringiz bor, joriy yilgi mavsum finali Turkiyaning Istanbul shahrida o‘tkazilishi rejalashtirilgan edi. Ammo Turk davlatining bir necha hafta oldin karantinga kirganligi va virus aniqlanishining Yevropadagi eng yuqori ko‘rsatkichlari tufayli ingliz klublari va ularning muxlislarida Kichik Osiyoga borishdan xavotirlar mavjud.

Reja bo‘yicha, 29 may sanasida o‘tkazilishi kerak bo‘lgan final bahsiga Buyuk Britaniyadan 17 may kunidan boshlab muxlislar uchishiga ruxsat beriladi. Jami sakkiz ming ingliz muxlislari kelishi ko‘zda tutilgan bo‘lib, mamlakatni xuddi shu narsa tashvishga solmoqda. Xabarda, futbolchilar va klub fanatlarining xavfsizligini ta’minlash maqsadida final o‘yinini Angliyaga ko‘chirish taklifi ilgari surilgani alohida ta’kidlab o‘tilgan.

Tashkilotda ikkinchi variant ham mavjud bo‘lib, unda o‘tgan yildagi kabi finalni Potugaliyada o‘tkazish ko‘zda tutiladi.