OFK kubogi 3-turidan o‘rin olgan "Nasaf" - "Oltin Asr" uchrashuvidan oldingi matbuot anjumanida Ro‘ziqul Berdiyev jurnalistlar savollariga javob berdi.
«Ertaga biz uchun ham, raqib uchun ham muhim va hal qiluvchi bahs. "Oltin Asr" jiddiy va tajribali jamoa, qiyin o‘yinga tayyorgarlik ko‘rayapmiz. Hal qiluvchi bahsga barcha futbolchilarimiz tayyor.
Ertaga muxlislarimizni xursand qiladigan natija qayd etishga harakat qilamiz. Yigitlar bilan gaplashib oldik. Hech kim durang haqida o‘ylayotgani yo‘q, faqat g‘alaba uchun maydonga tushamiz.
Futbolchilarimiz buni tushunib turibdi. "Oltin Asr" jamoasini yaxshi o‘rganib chiqdik va tarkibida Turkmaniston terma jamoasining ko‘plab o‘yinchilari borligini ko‘rdik, tajribali jamoa.
Shu bois bo‘shashmaymiz va g‘alabani ko‘zlab o‘ynaymiz. Haqiqatdan ham bo‘lajak raqibimiz yakkakurashlarda ancha yaxshi o‘ynaydi. Lekin futbolda bu muhim ahamiyat kasb etmaydi, ertaga raqibdan tezroq va chaqqonroq bo‘lishimiz kerak.
"Oltin Asr"ning kuchli va kuchsiz tomonlariga e’tibor qaratdik. Kuchli tomoni raqibning tajribali futbolchilari ko‘pligi. Tarkibda Turkmaniston milliy terma jamoasi a’zolari bor.
O‘ylaymanki ertaga yigitlarimiz vazifani uddalashadi.
"Xo‘jand" bilan o‘yinga jiddiy tayyorlandik va birinchi taymda bor kuchimiz bilan o‘ynadik. Tanaffus vaqtida yigitlardan keyingi o‘yinga ham kuchni asrashni, lekin hali oldinda 45 daqiqa borligini va bo‘shashmaslikni so‘radim.
Istalgan jamoa 3:0 hisobidan keyin biroz ehtiyotkor o‘ynaydi. To‘g‘ri ikkinchi taymda hujumda bor kuchimiz bilan o‘ynamadik va keyingi bahs haqida o‘ylay boshladik. O‘zgarishlar qildik va yoshlarni maydonga tushirdik.
"Oloy" bilan bahsning ikkinchi taymi. Sababi birinchi taymning o‘zida ko‘p vaziyatlar yaratdik va ikkinchi taymda 4ta gol urdik. "Xo‘jand" esa o‘z maydonida o‘ynadi va "Oloy"dan biroz kuchli ekanligini ko‘rinib turdi. “Xo‘jand” o‘z chempionatining liderlaridan biri hisoblanadi.
Xudo xohlasa guruhdan chiqsak tarkibimizni biroz kuchaytirishimiz kerak. Milliy chempionatimiz va kubokda ham yuqori maqsadlarni qo‘yganmiz. Yuqori maqsadlar juchun faqat bitta tarkib bilan harakat qilish qiyin bo‘ladi.
OFK kubogida ham uzoqqa borishni xohlaymiz. Buning uchun yozda tarkibimizni kuchaytirishimiz kerak. Bu borada rahbariyat bilan gaplashib olganmiz», - deydi "ajdarlar" bosh murabbiyi.
