Tez orada, iyun oyining 11-sanasida Italiyaning Rim shahrida start oladigan ko‘hna qit’aning eng nufuzli musobaqasi uchun kuy bastalandi. Ushbu qo‘shiq turnirning rasmiy madhiyasi sifatida musobaqaga o‘zgacha ko‘rk bag‘ishlashi aniq. Musiqa "We are The People" ya’ni "Biz xalqmiz" deb nomlangan bo‘lib, afsonaviy niderlandiyalik DJ prodyuser Martin Gerriks boshchiligida, The Edge va Bono ishtirokida ijro etilgan. Ushbu xonandalar 2019 yilning oktyabrida, Amsterdam shahrida UEFA tomonidan o‘tkazilgan yig‘inda rasman qo‘shiq ijrochilari bo‘lish uchun tanlab olingan edi.
Rasmiy madhiya Yevro-2020ning har bir uchrashuvi boshi va so‘ngida doimiy jarang sochib turadi. Shuningdek, teletranslyasiyalar rasmiy kirish grafikalarida orqa fon musiqasi sifatida foydalaniladi.
Ushbu musiqa bugungi kunda qiyinchilik va murakkab sinovlarga duch kelayotgan Yevropa xalqlari uchun birdamlik madhiyasi bo‘lib xizmat qiladi. Barcha qatnashchi terma jamoalarga oldinga intilish uchun ruhiyat baxsh etadi. Musiqa Yevro-2020ning ahillik ramziga aylanadi.
Tarixda ilk marotaba UEFA qit’a chempionatini butun kontinent bo‘ylab, ko‘plab mamlakatlarda tashkillashtirmoqda. Ushbu nooadatiy turnir tashkilotning 100 yillik yubileyiga bag‘ishlab shu ko‘rinishda o‘tkazilishi belgilangan. Mana shu faktor ham musobaqa madhiyasini keng qamrovli mazmunga ega bo‘lishini talab qilgan va "Biz xalqmiz" deb nom olishiga turtki bo‘lgan.
Turnir boshlanishiga bir oy qolganda, 11 may, seshanba kuni Londondagi «Uembli» stadionida, katta monitorlar orqali Yevro-2020 ranglari jilosi ostida rasmiy musiqa ilk bor ommaga namoyish etilgandi. Aynan ushbu stadion musobaqa finaliga mezbonlik qilishi belgilangan.
Musobaqa madhiyasi haqida, UEFA marketing bo‘limi boshlig‘i Gay-Larent Epshteyn shunday deydi:
"Uzoq kutilgan damlar yaqinlashmoqda. Biz siz muxlislarga ushbu ajoyib taronani taqdim etishdan baxtiyormiz. "Biz xalqmiz" kuyi, odamlarga yoqishidan umidimiz katta. Futbol va musiqa birlashib, butun Yevropa xalqiga haqiqiy qudrat baxsh eta oladi degan fikrdamiz".
Jaloliddin Ismatov tayyorladi.
