Angliyaning  “Brooke House College” futbol akademiyasi delegasiyasi “Bunyodkor” futbol klubiga tashrif buyurdi.

Ertaga Toshkent davlat transport universitetida “Brooke House College” futbol akademiyasining rasmiy ochilish marosimi o‘tkaziladi. Bugun ingliz akademiyasining texnik direktori Miki Adams boshchiligidagi delegasiya “Bunyodkor” futbol klubiga tashrif buyurib, direktor Ulug‘bek Mirzayev bilan uchrashdi. Har ikkala rahbarning o‘zaro samimiy suhbati davomida tomonlar o‘zlari haqida batafsil gapirib berishdi. Shuningdek, akademiyalarning faoliyati, ish uslubi va tartibi to‘g‘risida fikr almashishdi.

Ma’lumot o‘rnida aytib o‘tish kerak, Miki Adams Angliya terma jamoasida 4 ta uchrashuvda maydonga tushgan bo‘lsa, Premyer ligada 400 dan ortiq bellashuvda harakat qilgan. 800 dan ortiq o‘yinda turli jamoalarni murabbiy sifatida maydonga boshlab tushgan. Xususan, ko‘pchiligimizga ma’lum, “Lester”, “Fulxem”, “Sheffild Yunayted” singari jamoalarda murabbiy sifatida faoliyat yuritgan.

Mehmonlar tashrif davomida “Bunyodkor” stadioni va muzeyi bilan ham yaqindan tanishdi. “Bunyodkor” futbol klubi direktori Ulug‘bek Mirzayev akademiyaning yurtimizdagi faoliyatiga omad tilar ekan, mazkur hamkorlikdan keyin yaqin kelajakda o‘zbekistonlik futbolchilar Buyuk Britaniyaga ko‘chib o‘tishiga tilakdosh bo‘ldi. Yodingizda bo‘lsa, millionlar o‘yiniga ilk qadamlarni Toshkentda qo‘ygan Piter Odemvingiye o‘z vaqtida Angliyaning “Vest Bromvich”, “Kardiff Siti”, “Stok Siti”, “Bristol Siti” va “Roterem Yunayted” jamoalarida to‘p surgan. Albatta ushbu hamkorlik Angliyada O‘zbekiston fuqarosi bo‘lgan o‘yinchilarning ko‘payishiga xizmat qiladi, dedi “Bunyodkor” futbol klubi direktori. O‘z navbatida Miki Adams O‘zbekiston iqtidorlarga boy mamlakat deya yurtimiz futboli haqida iliq fikrlarni bildirar ekan, asosiy maqsadimiz bu yerdagi iqtidorlarni Angliyaga olib ketish, deya o‘z fikrlari bilan o‘rtoqlashdi.