Ukraina terma jamoasi yarimhimoyachisi Ruslan Malinovskiy Yevro-2020 musobaqasida Niderlandiya bilan bo‘ladigan o‘yin haqida gapirdi.

«Ularda maydonning oldida va markazida juda yaxshi o‘yinchilar bor. Ular top-klublarda o‘ynashadi. Agar ularga erkin zonalar beradigan bo‘lsak, bizda juda ko‘p muammolar bo‘ladi. Bu guruhdagi uchta o‘yinning faqat birinchisi. Albatta, biz ochko olishni istaymiz, ammo bu hal qiluvchi bahs emas. Shuning uchun, biz ushbu o‘yinda o‘zimizni biroz erkinroq tutishimiz kerak.

Bizga dastlabki 20 daqiqada maksimal konsentrasiya kerak, biz gol o‘tkazib yubormaslikka harakat qilishimiz talab etiladi. Shunda biz o‘yinga kirishib, o‘z futbolimizni namoyish eta olamiz. Gollandlar bilan ochiq futbol o‘ynash yaxshi fikr emas. Bizda bir nechta oldindan rejalar mavjud, ammo keling, ularni o‘yin paytida namoyish etaylik.

Yaxshi tayyorgarlik ko‘rdik. Niderlandiya terma jamoasi qiyin raqib, ammo biz uchrashuvga tayyormiz. Ular uyida o‘ynashadi, shuning uchun ular birinchi daqiqalardanoq harakat qilishadi. Asosiysi, himoyada yaxshi o‘ynash ”, - dedi Malinovskiy.