"Neftchi" bosh murabbiyi Ilhom Mo‘minjonov Pro liganing 11-turi doirasida "Yangiyer"ga qarshi bo‘lib o‘tgan o‘yin (2:0) borasida o‘z fikrini bildirib o‘tdi.

"Bugungi o‘yinda g‘alaba qozonishimiz shart edi, chunki, bundan avval ketma-ket ikkita uchrashuvda jami 5ta gol o‘tkazib yuborib, mag‘lub bo‘lgan edik. Bugun himoya chizig‘imiz nolga o‘ynadi. Hujumda esa 2 ta gol urishga muvaffaq bo‘ldik. Yarim himoyada ham faol o‘yin namoyish etildi. Shuning uchun, bugungi g‘alaba bilan barchani tabriklab qolaman. Keyingi uchrashuvlarga tayyorgarlikni olib borib, ochko yig‘ishda davom etamiz.

Bugungi kunda jamoamizda 20 ta maydon o‘yinchilari bor. Chap qanotda harakatlanib kelgan Saydullo Rahmatovda charchoqlik alomatlari paydo bo‘lganligi sabab, bugungi o‘yinda Umar Adhamzodaga imkoniyatni taqdim etdik va u o‘zini ijobiy tomondan ko‘rsatib, ishonchimizni oqladi. Zaxirada qolib ketgan Izzatilla Abdullayev, Sherzod Karimov va Tohir Shamshitdinovlar bugungi bahsga psixologik va taktik jihatdan tayyor turganligi tufayli asosiy tarkibda harakat qildilar. O‘ylaymanki, keyingi uchrashuvlarda ham ular o‘zlarining yorqin o‘yinlarini namoyon etishadi. Chempionatimiz  hali uzoq davom etishini inobatga olib, Abdulloh Olimov  va Saydullo  Rahmatov singari futbolchilarimizni ayagan holda, zaxiradan maydonga tushirdik.

Keyingi bellashuvlarga jiddiy tayyorgarlik ko‘rib, o‘zimizni ustimizdan ko‘proq ishlashga harakat qilamiz. Chunki, Pro liganing yetakchi klublarida katta tajribaga ega nomdor murabbiylar faoliyat yuritib kelmoqda. Ular ham bizga qarshi kechadigan bahs oldidan o‘yinlarimizni taxlil  qilib, o‘rganib chiqishadi. Shuning uchun, bizga qiyinchiliklarni keltirishlari turgan gap. Biz ham o‘z tomonimizdan hatolarimiz ustidan jiddiy ish olib borib, mashg‘ulotlarda astoydil harakat qilamiz.

Maqsadimiz bitta, Superligaga chempion bo‘lib chiqish. Yigitlarimiz esa buning uddasidan chiqishadi degan umiddaman", — dedi bosh murabbiy.

"Neftchi" matbuot xizmati