Superliganing 10-turidan o‘rin olgan "Turon" - "Bunyodkor" (0:3) uchrashuvidan keyin mehmonlar bosh murabbiyi Shuhrat Maqsudov OAV xodimlarining savollariga javob qaytardi.

- Yaypanga kelib "Turon" klubiga yaratilgan sharoitlarni, qurilayotgan akademiyani ko‘rib juda ham xursand bo‘ldim. Shunday fidoyi insonlar ko‘paysa o‘zbek futboli yanada rivojlanadi. O‘yin haqida gapiradigan bo‘lsam, bir oylik tanaffusdan unumli foydalanishga urindik. Bugungi bahs ancha qiyin bo‘lishini bilardik, sababi oldingi ikki turda jamoamiz juda yaxshi o‘yin ko‘rsatib g‘alaba qozona olmadik. Bu yigitlarning ruhiyatiga ta’sir qilishi aniq. Futbolchilarimiz bergan barcha ko‘rsatmalarimizni to‘liq bajarishdi va yakunda g‘alaba qozondik. Fursatdan foydalanib futbolchilar, klub muxlislari va rahbariyatini tabriklayman!

Boshqa jamoa murabbiylarining ishini muhokama qilish noto‘g‘ri deb bilaman. Faqat bir narsani ayta olaman, menga yetib kelgan ma’lumotga ko‘ra, "Turon"da rahbariyat futbolchilarga barcha sharoitni yaratib berishmoqda, mayda detallargacha e’tibor qilinmoqda. Shunday ekan g‘alabalar o‘zini ko‘p kuttirmaydi.

Birinchi taymda bizda ham, raqibda ham gol urish uchun imkoniyat bo‘ldi. Ammo bu futbol. Aytib o‘tganimdek oldingi ikki turda biz katta tashabbusga ega bo‘lib g‘alaba qozona olmagandik. O‘shanda ham natija o‘yinga mos bo‘lmagandi. Biz bu futbol, deb maydonni tark etgandik.