Madridning «Real» klubi yarim himoyachisi Eduardo Kamavinga transfer oynasi yopilguniga qadar jamoani tark etishi ehtimoli juda past.

Diario AS ma’lumotiga ko‘ra, «qirollik klubi» fransuz futbolchisi bo‘yicha takliflarni ko‘rib chiqishga tayyor, ammo faqat kamida 70 million yevro miqdoridagi takliflar muhokama qilinadi.

Hozirga qadar Kamavingaga qiziqish bildirgan klublarning hech biri «Real» talab qilayotgan summaga yaqinlashmagan.

Futbolchining o‘zi ham asosiy tarkibdagi o‘rnini yo‘qotganiga qaramay, Madrid klubini tark etish istagini bildirmagan.

Mish-mishlarga ko‘ra, «Manchester Yunayted» 23 yoshli yarim himoyachi uchun 50 million yevro to‘lashga tayyor bo‘lgan. Shuningdek, Kamavingaga «Chelsi» tomonidan ham qiziqish borligi aytilgan.

Fransiyalik futbolchining «Real» bilan amaldagi shartnomasi 2029 yilga qadar mo‘ljallangan.