Мадриднинг «Реал» клуби ярим ҳимоячиси Эдуардо Камавинга трансфер ойнаси ёпилгунига қадар жамоани тарк этиши эҳтимоли жуда паст.

Diario AS маълумотига кўра, «қироллик клуби» француз футболчиси бўйича таклифларни кўриб чиқишга тайёр, аммо фақат камида 70 миллион евро миқдоридаги таклифлар муҳокама қилинади.

Ҳозирга қадар Камавингага қизиқиш билдирган клубларнинг ҳеч бири «Реал» талаб қилаётган суммага яқинлашмаган.

Футболчининг ўзи ҳам асосий таркибдаги ўрнини йўқотганига қарамай, Мадрид клубини тарк этиш истагини билдирмаган.

Миш-мишларга кўра, «Манчестер Юнайтед» 23 ёшли ярим ҳимоячи учун 50 миллион евро тўлашга тайёр бўлган. Шунингдек, Камавингага «Челси» томонидан ҳам қизиқиш борлиги айтилган.

Франциялик футболчининг «Реал» билан амалдаги шартномаси 2029 йилга қадар мўлжалланган.