Superliga 10-turidan o‘rin olgan «Navbahor» hamda «Mash’al» jamoalri o‘rtasidagi bahsdan so‘ng mezbonlar ustozi Viktor Jalilov matbuot anjumanida ishtirok etdi.
«Mash’al»ga qarshi o‘ynash hamma jamoalarga qiyin bo‘lmoqda. Ularga qarshi shunchaki o‘yin o‘tkazganimizni eslolmayman. "Mash’al"da ishlab, "Navbahor"ga qarshi o‘ynaganimizda ham shunday holat kuzatilgandi.
Bugun omad biz tomonimizda bo‘ldi. O‘tgan yili ushbu jamoaga ikkita o‘yinni boy bergandik, shu noxush an’anani buzganimizdan xursandman. Yigitlarga matonat ko‘rsatishgani uchun rahmat aytaman.
Jismoniy tayyorgarligimizda ijobiy holat kuzatilmoqda. Jamoa 2:0 hisobida oldinda borayotganda, psixologik tomondan hisobni saqlab qolishga intiladi.
Bugungi raqibimizni yaxshilab o‘rgangandik. Videotahlillardan tashqari, statistik ma’lumotlariga ham e’tibor qaratdik. Bugun raqib uch hujumchi bilan o‘ynagan bo‘lsada, ulardan kam hujum uyushtirmadik. Hamma gap hujumchining maydonda nechtaligida emas.
Shuni alohida ta’kidlamoqchimanki, yigitlar bugun g‘alaba qozonib, ushbu g‘alabani Odil Ahmedovni qo‘llab-quvvatlashga bag‘ishlashlarini aytishdi. Odilning termamizga yana foydasi tegishi aniq edi, lekin u milliy jamoadagi faoliyatini yakunlaganini bildirdi, deydi—Jalilov.
