Superliganing 10-turidan o‘rin olgan "Nasaf" — "Andijon" uchrashuvidan so‘ng mezbonlar bosh murabbiyi Ro‘ziqul Berdiyev matbuot anjumanida ishtirok etdi.

— OFK kubogi doirasida markazlashgan o‘yinlardagi muvaffaqiyatlarimiz bilan jamoamiz muxlislarini tabriklayman. FIFA kunlari sabab Superligada biroz tanaffus yuzaga keldi. Tanaffus baribir o‘z so‘zini aytmasdan qolmaydi. Bugungi o‘yinda "Andijon" jamosi turnir jadvalida pastda bo‘lgani tufayli natija uchun o‘ynashini bilardik. Ko‘rib turganingizdek, raqib qarshi hujumga tayangan holda 5-4-1 sxemasini tanladi. Shu sabab biz ham oldingi chiziqda vaziyatlar yaratishga qiynaldik. Qizil kartochka oldimizdagi vazifani biroz qiyinlashtirdi. Lekin yigitlar vaziyatga to‘g‘ri baholay olishdi va ikkinchi golni urib o‘yin taqdirini hal qilishdi.

— Qizil kartochkali vaziyatda bu ko‘proq kimni xatosi deb bilasiz?
— Hujum tashkil etayotganimizda to‘pni yo‘qotdik. Shundan so‘ng raqib xavfli hujum tashkil etdi. Himoyachilarimiz ham o‘yindan tashqari xolatni yuzaga keltirishda xatoga yo‘l qo‘yishdi. Bu vaziyatda Umid Ergashevning qo‘l bilan o‘ynashini xato deb aytmagan bo‘lardim, chunki to‘p undan ham o‘tsa gol bo‘lishi mumkin edi.

— Jamoa 3 ta frontda kurashmoqda. Transferlar oynasi vaqtida tarkibni kuchaytirish rejada bormi?
— Albatta, biz buni judayam istayapmiz. Bir tarkib bilan 3 ta musobaqada muvaffaqiyat qozonish juda qiyin. Hozirda tarkibimizga yangi futbolchilarni qo‘shib olish uchun izlanishdamiz. Qaysidir futbolchini oladigan bo‘lsak, oldimizdagi vazifalarni yecha oladigan darajasi bo‘lishi kerak. Tajribali, kuchli legioner olishimiz kerak, shuningdek qanotda faollik namoyish etadigan futbolchi ham bizga kerak bo‘ladi.

— “Mash’al"dan kelgan legioner futbolchi jamoada ko‘rikdan o‘tmoqda. Bu haqida nimalarni ayta olasiz?
— Bu futbolchining bizga ma’qul keladigan jihatlari bor, to‘p bilan juda yaxshi harakat qilar ekan. Ammo o‘ziga yarasha kamchiliklari ham bor. Bu futbolchining transfer huquqi hozirda "Mash’al" jamoasiga tegishli. Klubimiz rahbariyati bu borada kelishuvga erishsa, balki uni jamoamizda ko‘rarmiz.

— Terma jamoaga turli murabbiylar nomzodi ko‘rib chiqilmoqda. Sizga bu borada jiddiy taklif tushsa jamoadan ketarmidingiz?
— Hozir "Nasaf"daman, oldimizda jiddiy vazifalar turibdi. Hozir faqat zimmamdagi vazifalar haqida o‘ylashim kerak, bu bugungi o‘yindan chiqib ketib gapirish kerak bo‘lgan savol.

— Husayin Norchayev oldingi chiziqda yolg‘izlanib qolayotgandek...
— Biz har bir o‘yinda maksimal darajada harakat qilayapmiz. Imkon qadar zaxiramizdan hujumchi chiqarishga harakat qilayapmiz. Lekin hozirgi kunda zaxira variantlarmiz ko‘p emas. O‘z imkoniyatimizdan kelib chiqib harakat qilayapmiz.