Bir qator kuchli terma jamoalar ishtirok etayotgan "Kopa Amerika" turniri guruh bosqich o‘yinlari davom etmoqda va unda tobora ko‘p narsa oydinlashib bormoqda. Yakunlangan 4 tur ham bizga bir qator qiziqarli bahslarni taqdim etdi. Sermahsullik bobida ham ushbu tur qolganlaridan ajralib turdi. Demak, bugun va kecha bo‘lib o‘tgan barcha o‘yinlarga to‘htalib o‘tamiz.
"A" guruhi
Ekvador - Peru 2-2
Ushbu guruhda 4-tur anchagina qizg‘in kurashlarga boy bo‘ldi. Ilk o‘yinda Ekvador terma jamosi Peruga qarshi maydonga tushdi. O‘yinning 23-daqiqasida Peru futbolchisi Renato Tapia o‘z darvozasini ishg‘ol etib qo‘ydi. Birinchi bo‘limga qo‘shib berilgan daqiqalarda esa Ayrton Presyado gol urib, Ekvador 2-0 hisobida tanaffusga chiqib ketishini ta’minlab berdi. Ikkinchi bo‘limni Peru anchagina hujumkor boshladi va 48 daqiqada Janluka Lapadula hisobni qisqartirishga muvaffaq bo‘ldi. Biroz o‘tib, ya’ni 54-daqiqada Andre Karillyo gol urib muvozanatni tikladi. Shunday qilib, 2-2 hisobi o‘yin yakunigacha saqlanib qoldi.
Braziliya - Kolumbiya 2-1
Ushbu guruhning va turning markaziy o‘yinlaridan biri bu Braziliya Kolumbiya uchrashuvi edi. O‘yinning 10- daqiqasida kolumbiyalik Luis Fernando Dias o‘zining super zarbasi bilan hisobni ochib berdi. Shundan so‘ng, braziliyaliklar tinimsiz hujumlar uyushtirishdi, ammo hujumlar samarasiz yakunlanar edi. 78-daqiqa o‘tib borayotgan bir paytda nihoyat Firmino gol urib, hisobni tenglashtirdi. O‘yinga qo‘shib berilgan vaqtda yani 100-daqiqada Kazemiro gol urdi va Braziliya g‘alabani ilib ketdi. Drammatik bahsda "pentakampeonlar" o‘z hisobiga navbatdagi ochkolarni yozib qo‘yib, keyingi bosqichga birinchi o‘rinda chiqish masalasini hal qildi.
"B" guruhi
Boliviya - Urugvay 0-2
Ikkinchi guruhdan o‘rin olgan uchrashuvlar ham anchagina qiziqarli va kutilmagan natijani bizga taqdim etdi. Urugvay hamda Boliviya terma jamoalari o‘rtasidagi uchrashuvning 40-daqiqasida boliviyalik Xayro Kinteros o‘z darvozasini ishg‘ol etib qo‘ydi. 79-daqiqada esa Urugvay terma jamoasining tajribali hujumchisi Edinson Kavani hisobni 2-0 ko‘rinishiga keltirib qo‘ydi va ular o‘z hisobiga 3 ochkoni yozdirib qo‘yishdi.
Paragvay - Chili 2-0
Ushbu guruhdan o‘rin olgan ikkinchi bahsda biroz kutilmagan natija qayd etildi. 33-daqiqada Brayan Samudio o‘yinda hisobni ochib berdi. Ikkinchi bo‘limning 58-daqiqasida esa Migel Almiron Paragvayning ikkinchi goliga mualliflik qildi va o‘yinda boshqa hisob o‘zgarmadi. Ushbu g‘alabadan so‘ng paragvayliklar muhim 3 ochkoni qo‘lga kiritib, keyingi bosqichga chiqish masalasini hal etdi.
